Күлпәш пен Шімәнді, үлгі ету күмәнді

Әртіс болған соң кез келген образды сомдау әбестік емес. Оны көзіқарақты көрермен де жақсы біледі. Әттеген-ай дейтін тұсы әйел рөлін ойнайтын ер азаматтардың кейбір қылықтары көңіл қынжылтады. Көрерменді күлдірсем болды деп олпы-солпы киініп, жалбыраған шаш жалғап, сахнаға жүгіре шығатындары шымбайға тиеді. Әйел атаулының бәрі «аузынан ақ ит кіріп, көк ит шығатын» көкдолы еместігінде ескермейді. Нәзік жандының кейіпінде екенмін деп шабалаңдап ұрысып, жағымсыз дауыс салып, даурығып тұрғаны. Рөлді осындай әдепсіз қылықтарсыз-ақ қызықты етіп алып шығуға болмайды ма? Төрт-бес минуттық қойылымдардан бөлек, қазір қазақша фильмдердің бірқатарында «әйел-еркекті» көресіз. Оларға не жорық? Әйел рөлін сомдайтын әртіс қыз-келіншектер құрып қалды ма, әлде олардың таланты ерлердікінен асып түсе алмайды ма?

Бұдан бөлек комедиялық жанрда түсірілген қазақша сериалдарда мұғалімді келемеждеп көрсету де көп кездеседі. Ұлағатты жанға баланған ұстаздың бетін тыжырайтып, белін бүкірейтіп, одан қалды көзіне бетінен екі есе үлкен көзілдірік кигізіп қоятынына таңым бар. Қанша жерден күлкілі сериал десеңіз де мәртебелі мамандық иелерін көрерменге былай көрсету әбестік.

Әйел рөлін ойнайтын актерлердің қазіргі көшін Сәбина келіннің бастан кешкендерін бірнеше бөлімге бөліп көрсетіп, өзі режиссер, өзі басты рөлдегі келін болатын Нұртас Адамбай тұр десек қателеспеспіз. Интернет материалдарында «Сәбина келіні» прокатқа шыққан алғашқы бес күнде-ақ 112 миллион теңге жинап, айды аспаннан бір шығарғаны тағы бар. Осы тақырыпта жазушы Зейнеп Ахметова да қынжылып: «Айта-айта шаршадым, бірақ әлі ескертіп жүрмін. Теледидарды бұрап қалсам, «Шаншардың» көрінісі болып жатыр. Бір кемпір сөйлеп тұр, оның өзі – еркек. Байқайсыздар ма, біздің қазақтың жігіттері қатын болуға әуес болып алды қазір. Әйтпесе дардай ер-азаматтар неменеге сонша әйел болуға тырысады? Басына орамал салып, үстіне көйлек киіп... Ойбай-ау, сонда әйелдің рөлін ойнайтын қыз-келіншектер құрып қалды ма? Толып жатыр. Бірақ үп-үлкен ер-азаматтар әйел болуға құмар болады да тұрады. Бізде намыс азайып бара жатыр», – деп пікір білдірген.

Әйелді сомдап әйгілі болғандардың тізімін жалғасақ, «Шаншардағы» Нұржан Құлшынбаев, «Шымкент шоудағы» Берік Тұрсынбеков, «Базар жоқтағы» Ерболат Төлегеновтің есімі де жиі айтылады. Соңғы екеуін отандық телеарналардан көзіміз жиі шалады. Бірнеше бөлімнен тұратын «Зың-зың Күлпәш» ситкомында Тұрсынбеков әйгілі бейнесінде басты рөлде ойнайды. Ерболат дегеннен гөрі «Шімән апа» атымен танымал Төлегенов келіндер сериалында ойнау арқылы отандық телеарнаның төрінен орын алыпты.

Дінтанушы мамандардың айтуынша: «Дінімізде ер адамның әйел кісіні немесе әйел адамның ер кісіні ойнауы дұрыс емес. Шариғат бұған тыйым салған. Өйткені Пайғамбар әйелге ұқсаған ер адамды, еркекке ұқсаған әйел адамды Алла Тағала лағынеттейтінін айтқан. Сондықтан қандай ниетте болсын, мейлі шынайы емес, ойын немесе рөл ретінде ойнаса да болмайды. Сол сияқты шайтанның, кәпірдің, Пайғамбарлар мен сахабалардың да бейнесін келтіруге болмайды делінеді. Тағы бір айта кететін жайт, құлшылықты да жай ойын түрінде көрсету сол ғибадатқа деген құрметсіздікті білдіреді. Ең бастысы, бұл жерде өтірік алдау бар. Ал дінімізде «Бізді алдаған бізден емес» деген сөздер барын есте ұстаған жөн», – дейді олар.