Қаламгерге көрсетілген құрмет
Алматы қаласында көрнекті мемлекет және қоғам қайраткері, Қазақстанның Халық жазушысы Шерхан Мұртазаға құрмет көрсетілді. Халықтың ерекше ықыласына бөленген қарымды қаламгердің әруағына құран бағышталып, бейітінің басында ескерткіш орнатылды. Өзі тұрған үйге ескерткіш тақта қойылды.
Ескерткіш тақтаның ашылу рәсіміне Алматы қаласының әкімі Бақытжан Сағынтаев, Сенат депутаты, белгілі журналист Нұртөре Жүсіп, танымал композитор Алтынбек Қоразбаев, белгілі ғалым Мекемтас Мырзахметов қатысты. Ол кісілер Шерхан Мұртазаның өнегелі өмір жолы, шығармашылығы, адамгершілігі және басқа да қасиеттері жөнінде әңгімелеп берді. Шерхан Мұртаза 1932 жылы 2 қыркүйекте Жамбыл облысы, Жуалы ауданы, Талапты ауылында дүниеге келген. 1955 жылы М.В. Ломоносов атындағы Мәскеу мемлекеттік университетін бітірген ол еңбек жолын Қазақ мемлекет көркем әдебиет баспасында бастады. Одан кейін, «Лениншіл жас» (қазіргі «Жас алаш»), «Социалистік Қазақстан» (қазіргі «Егемен Қазақстан») газеттерінде тілші, әдеби қызметкер, редактор болды. 1970-75 жылы «Жазушы» баспасы жанындағы Балалар мен жастар әдебиеті бас редакциясының және «Жалын» альманахының, «Жұлдыз» журналының бас редакторы қызметтерін атқарды. 1975-80 жылдары Қазақстан Жазушылар одағы басқармасының 2-хатшысы, 1980-92 жылдары «Қазақ әдебиеті», «Егемен Қазақстан» газеттерінің бас редакторы болды. 1992-94 жылы «Қазақстан» мемлекет телерадио компаниясының төрағасы қызметтерін атқарды. Ал 1990-1993 жылдарда ҚазКСР Халық депутаты, 1994-2004 жылдарда ҚР Жоғарғы Кеңесінің ҚР Парламенті Мәжілісінің 2-ші шақырылымының депутаты болды.
Шерхан Мұртаза «Құрмет белгісі», «Отан» ордендерімен марапатталған. Қарымды қаламгер «Қара алқа» романы үшін ҚазКСР Мемлекеттік сыйлығының алды. Сондай-ақ. ол Қазақстанның Халық жазушысы атанды.
