Қырғызстанда ұзын қазы әзірленіп, рекорд жаңартылмақ

 

  11 наурыз күні Бішкекте ұзындығы 110 метрлік қазы дайындалады, деп хабарлайды Baq.kz ақпарат агенттігі knews.kg сайтына сілтеме жасап.

   Бұған дейін ұлттық тағам шеберлері қазының ұзындығы 100 метр болады деп жоспарлаған. Осы шараны ұйымдастырушылардың бірі Элнұр Кулуева қазыны тағы 10 метрге ұзартудың себебін айтты. Бұған дейін қазақтың қазы шеберлері 100 метрлік шұжықпен Гиннестің рекордтар кітабына енген болатын. Енді қырғыз азпаздары өздерінің шұжықтарын 10 метрге асырып дайындамақ.

«Негізгі күш асылған жылқы етін әзірлеуге жұмсалады. Бүгін дайындық жұмыстары басталып кетті. 8 жылқы сойылып, 40 аспаз жұмылдырылады», - дейді Э.Кулуева.

   Бұл іс-шараға Гиннес рекордтар кітабының өкілдері келіп қатысады. Айта кетерлігі, 2008 жылы Қытайда тұратын ерлі-зайыпты Болат Бейнелұлы мен Гүлзат Азанбекқызы ұзындығы 100 метр, салмағы 1 тонна болатын қазы жасаған. Ол Гинесс рекордтар кітабына енгізілді. Сондай-ақ, кейіннен 2014 жылы Қытайдың Шыңжаң-Ұйғыр автономиялық өлкесіне қарасты Тарбағатай аймағының Дөрбілжің қазақ ауданында «Қазақ ұлтының дәстүрлі тағамдары» жәрмеңкесінде Гиннестің рекордына ұзындығы 1 111 метр болатын қазы ұсынылды. Оның салмағы – 4 572 кг.