«Бірлігі артқан елден береке тұрақ табады». «Нұр Отан» партиясы Қазалы аудандық филиалының кезектен тыс ХХVI конференциясы көтерген мәселе осыған саяды. Еліміздегі жетекші партияның жүріп өткен жолы, алдағы атқарылар жұмысы мен бағыт-бағдарын айқындаған салмақты жиын ҚР Парламенті Мәжілісінің депутаттары Б.Мамраев, Н.Дулатбеков, Б.Мәкен, К.Мұсырман, «Нұр Отан» партиясы облыстық филиалы төрағасының орынбасары Е.Байтілес, «Рза» АҚ президенті, облыстық қоғамдық кеңес төрағасы С.Имандосов, сая­си кеңес мүшелері мен партия белсенділері және де облыс, ауданнан сайланған депутаттар мен делегаттардың басын қосты.

«Нұр Отан» партиясы аудандық филиалының төрағасы, аудан әкімі М.Ергешбаев модераторлық еткен кезектен тыс конференция нақты төрт толымды мәселеге маңыз беріп, басымдықтарды айқындады

Жасампаздық пен әлеуметтік даму кезеңіне баланатын партияның 20 жыл­дық белесі мен «Нұр Отанның» 2030 жылға дейінгі бағдарламасы туралы байыпты баяндама жасаған «Нұр Отан» партиясы аудандық филиалы төрағасының бірінші орынбасары Қ.Мәмбетжан көптің көкейіндегісін дөп басып, ортақ іс, байыпты бастама, бірлікті жолда береке барын ұғындырды.

«Өз халқының өркендеуі жолында қалтқысыз қызмет еткен, сенімді тірек, кәсіби қалыптасқан командаға айналған партия бірігу үрдістері арқылы көкейкесті мәселелердің күрмеуін тарқатып, шешімін табуына күш-жігерін жұмылдырып келеді. Миллионнан астам мүшесі бар «Нұр Отанның» жиырма жылдық мерейтойы мереке ғана емес, ел дамуының маңызды белесі», – деді аудандық партия филиалының бірінші орынбасары конферен­цияға жиналған­дар алдында.

ҚР Президентінің «Қазақстан­дық­тардың әл-ауқатының өсуі: табыс пен тұрмыс сапасын арттыру» атты 2018 жылғы Жолдауын іске асыруда Қазалыда жүзеге асқан жұмыстар жайында аудан әкімінің орынбасары, «Нұр Отан» партиясы аудандық филиалы саяси кеңесінің мүшесі Ә.Жарылқағанов атап өтті.

Өткен жылды толымды табыс­тармен қоры­тындылаған аудан­дағы әлеуметтік ахуал тұрақты.

Ана өлімі тіркелмесе, бала шетінеу саны азайған. «Ангиограф» аппараты ауру­ларды анық­тауды жеңілдетпек. Жекемен­шік әріптестік аясында емдеу орындары жаңадан бой көтеріп, ауданда­ғы медицина сала­сындағы батыл бетбұрыстар аудандық ауру­хананың ауданаралық статусын алуына мүмкіндік тудырған. Медициналық сақтандыру тәжірибесі көпшіліктен қолдау тауып, оны жүзеге асыру жұмыстары жақсы жүргізілуде.

Жолдауда басымдылық беріліп отыр­ған білім бөліміндегі еселі қиын­дықтар еңсерілген. Бірнеше тәрбие, тәлім орындарының жылу жүйесі қалыпқа келіп, жөндеу жұмыстары жүргізіліп, заманауи қондырғыларға қолжетімділік артқан. Қос ауысымда сабақ оқитын сондай-ақ апатты жағдайдағы мектептер жөнге келіп, мектепке дейінгі мекемелермен бүлдіршіндерді қамту жолға қойылған.

Салауатты өмір салтын ұста­натын спорт­сүйер қауымға да серпінді жол ашылған.

Елбасы белгілеген Жастар жылы­ның да жос­парлы жұмыс­тары нақтылан­ған. Мәселен, жаңа кәсіппен айна­лысатындарға қолдау көрсетіліп, әр салада белсенділік танытқан ел ертеңдерін ынталандыру мақса­тымен Ғани Мұратба­ев атындағы жастар сыйлығын тағайындау шарасы қолға алынған.

«Шилі» атындағы бастауыш партия ұйымының төрағасы Ұ.Қалиев «Нұр Отан» партиясы Қызылорда облыстық филиа­лының кезектен тыс ХХІІ конференциясына ұсынылған делегаттармен таныстырды.

Конференцияда сөз алған Мәжіліс депутаты Б.Мамраев басты капитал – адами құндылыққа маңыз берген мемлекет ұстанған саяси бағыт жайлы ойымен бөлісті.

Жеделдік жақсылыққа жол ашатынын алға тартып, жастарға заман ағымына ілесіп, дамуға күш-жігерін жұмылдыру керектігін ерекше атап өтті.

Дептутат қаузаған педагогтар статусының айқындалып, лайықты бағалануы парламентте қызу талқы­ланып жатқандығы көпті қанат­тандырды.

Облыстық партия филиалы төраға­сы­ның орынбасары Е.Байтілес «Нұр Отан» партиясы қолға алған 20 жасампаз істің бірі жаңарған Қазақстандағы жасампаздық жол жаңғыруға бетбұрыс екенін жеткізді.

Конференцияға қатсушылар күн тәртібінде қаралған мәселелер мен жиын жүктеген міндеттердің барысымен танысып, алдағы ахуалға қанықты.