Аудандық орталық кітап­ханада 18 сәуір – Халықаралық ескерткіштер мен тарихи орындарды қорғау күніне орай Елбасының «Рухани жаңғыру» бағдарламасы аясында «Қорқыт­тану және өлке тарихы» ғылыми-зерттеу институтының ғылыми қызметкері Бақытжан Ахметбектің «Сыр ескерткіштері» кітабының таныстырылымы өтті.

Оқырман назарына ұсынылған Бақытжан Ахметбектің «Сыр ескерт­кіштері» кітабына ежелгі Сыр өңірінің киелі орындары, осы өлкеден шыққан топ бастаған отауызды, орақ тілді айтулы би-шешендер, қол бастаған батырлар мен дүлдүл ақын-жыраулар, әулие-әнбиелер, тарихи ескерт­кіштер мен кесенелер жайлы ғы­лыми-зерттеу мақалалары топ­тастырылған. Түркі әлеміндегі ірі тұлға Қорқыт Ата жайлы зерт­теулері тың әрі қызықты.

Шараға ардагерлер, білім және мәдениет саласының қыз­меткерлері, оқырмандар қаты­сып, ой-пікірлерін ортаға салды.

Сондай-ақ, көпшілікке «Ескерт­кіштер – ел тарихы» атты кітап көрмесі таныстырылып, Қазалы аграрлы-техникалық колледж сту­денттері жыр-шумақтарын оқыды.

Кешті қорытындылаған аудан­дық орталық кітапхана директоры И.Назарова: Сыр бойы – тұнған сыр. Осынау сырға толы өлкені өскелең ұрпаққа таныстыру, таныту – біздің борышымыз», – деп кешке қатысқан барша оқырманға алғысын білдірді.