1 қарашадан бастап Қазақстанда не өзгереді: халық білуі тиіс маңызды жаңалықтар

2026 жылғы 1 қарашадан бастап Қазақстанда бірқатар жаңа ереже мен талап күшіне енеді. Өзгерістер елге шетелдіктердің кіру тәртібіне, банк қызметтеріне, халықаралық жүк тасымалына және кәсіпкерлік саласына қатысты. Сонымен қатар қараша айында тұрғын үй бағдарламалары мен коммуналдық тарифтерге байланысты жаңалықтар бар, деп хабарлайды Kyn.kz.

Қазақстанға келетін шетелдіктерге жаңа талап енгізіледі

1 қарашадан бастап елімізде QazETA электронды рұқсат жүйесі кезең-кезеңімен іске қосылады. Жаңа жүйе Қазақстанға визасыз келетін шетел азаматтарына арналған.

Шетелдіктер елге келерден кемінде 72 сағат бұрын электронды өтініш бере алады. Рұқсат тегін рәсімделеді және 180 күн бойы жарамды болады.

Алайда жаңа тәртіп бірден міндетті болмайды. 2027 жылғы 1 шілдеге дейін электронды рұқсат алу ұсыныстық сипатта жүргізіледі.

Еуропаның үш еліне визасыз бару мүмкіндігі кеңейеді

1 қарашадан бастап Қазақстанның қызметтік паспорт иелері Бельгия, Нидерланд және Люксембургке визасыз сапарлай алады.

Дегенмен бұл жеңілдік қарапайым азаматтық паспорт иелеріне қолданылмайды.

Банктердің кейбір қызметтері қымбаттайды

Қараша айында еліміздегі бірнеше банк тарифтік саясатына өзгеріс енгізеді.

Атап айтқанда, KMF Bank қолма-қол ақша беру қызметінің кейбір тарифтерін жаңартады. ForteBank пен Bereke Bank жекелеген тарифтік пакеттерге жаңа клиенттерді қосуды тоқтатады.

Ал 27 қарашадан бастап Halyk Bank қосымшасында Open API арқылы басқа банктерге телефон нөмірімен ақша аударудың комиссиясы 200 теңгеден 250 теңгеге дейін өседі. Бұл өзгеріс барлық ақша аударымына қатысты емес.

Кейбір өңірде коммуналдық қызмет арзандайды

Ақмола облысының Зеренді ауданында 1 қарашадан бастап жылу мен су тарифтері төмендейді.

Мәселен, Гранитный кентінде жылу тарифі 72 пайыздан астамға, ал Зеренді ауылында шамамен 20 пайызға қысқарады. Су тарифі де 8 пайыздан астамға арзандайды.

Бұл өзгерістер аталған елді мекендерге қатысты.

Кәсіпкерлерге жаңа талап қойылады

Қараша айында жеңіл өнеркәсіп өнімдерін таңбалауға қатысты жаңа ережелер енгізіледі.

14 қарашадан бастап киім-кешек пен кейбір тоқыма бұйымдарын таңбалау талаптары жаңарады. Ал жекелеген тауарларға міндетті Data Matrix таңбалауы 1 желтоқсаннан басталады.

Жаңа тәртіп негізінен тауар өндірушілерге, импорттаушыларға және сауда кәсіпорындарына әсер етеді.

Жүк тасымалдаушылар кепілдік төлем енгізеді

9 қарашадан бастап Қазақстан мен Өзбекстан шекарасындағы үш өткізу бекетінде халықаралық тасымалдаушылар үшін электронды кезекке қатысты жаңа талап қолданылады.

Тасымалдаушылар 20 АЕК немесе 86 500 теңге көлемінде кепілдік төлем енгізуі керек. Егер жүк көлігі белгіленген уақытта келсе, қаражат толық қайтарылады.

Қараша айындағы өзге де өзгерістер

Ай ішінде қазақстандықтарды тағы бірнеше жаңалық күтіп тұр.

3 қарашада әйелдерге арналған «Ұмай» ипотекалық бағдарламасының екінші кезеңіне өтінім қабылдау басталады деп жоспарланған.

5 қарашадан бастап Tele2 арқылы төленетін «Яндекс Плюс» жазылымының бағасы 1 999 теңгеден 2 499 теңгеге дейін көтеріледі.

Сондай-ақ қараша айында бірқатар салық есептілігін тапсыру мерзімі аяқталады.

Осылайша, қарашадағы өзгерістердің бір бөлігі тұрғындардың күнделікті шығындарына әсер етсе, енді бірі кәсіпкерлер мен халықаралық тасымалдаушыларға қатысты болмақ. Мамандар азаматтарға банк тарифтерін, қызмет көрсету шарттарын және жаңа талаптардың күшіне ену мерзімдерін алдын ала нақтылап алуға кеңес береді.