Күмбірле, күй – домбыра

Домбыра – қазақ халқының ежелден жеткен музыкалық аспабының бірі. Оның ұлт өмірінде алар орны бөлек.

Аталған құралдың құрылымы мен қасиетін терең түсінетін, құрметтеп-қастерлейтін ұрпақ тәрбиелеуге, өнерге деген сүйіспеншілігін, ықыласын арттыру мақсатында Қашақбай Пірімов ауылдық клубы мен кітапханасының ұйымдастыруымен «Күмбірле, күй – домбыра» атты әдеби таным сағаты өткізілді.

Шара барысында кітапханашы Гүлім Елханова Ұлттық Домбыра күні мерекесінің маңызы туралы сөз сөйлеп, «Домбыра – асыл мұра» атты кітап көрмесімен таныстырды. Ән үйірмесінің мүшесі Сабыр Ақниет орындаған «Сарыкөл самар», «Балбырауын» күйі кеш шырайын келтіре түсті. Сонымен бірге қазақтың халық әндері шырқалып, жиналғандарға көтеріңкі көңіл-күй сыйлады.

Гүлзат КӨПТЕНОВА,

кітапхананың тұрақты оқырманы