Қазақстанда 178 мыңнан астам медицина қызметкері сақтандырылды

Қазақстанда медицина қызметкерлерінің кәсіби жауапкершілігін міндетті сақтандыру жүйесі аясында соңғы екі жылда пациенттер мен олардың отбасыларына 502,6 млн теңгеден астам сақтандыру төлемі жасалды.

Фото: Жасанды интеллект көмегімен жасалды

Оның 155 856-сы мемлекеттік, 22 440-ы жекеменшік медициналық ұйымдарда жұмыс істейді. Ал жыл басынан бері медициналық ұйымдар 1 867 сақтандыру шартын жасасқан.

Медицина қызметкерлерінің кәсіби жауапкершілігін міндетті сақтандыру туралы заң 2024 жылғы қазанда күшіне енді. Құжат Мемлекет басшысының тапсырмасы бойынша әзірленген.

Жаңа тетік медициналық көмек көрсету кезінде пациенттің өмірі мен денсаулығына зиян келтірілгені расталған жағдайда сақтандыру төлемін алуға мүмкіндік береді. Сонымен қатар, медицина қызметкерлерін кәсіби тәуекелдерден қаржылық тұрғыдан қорғауды көздейді.

Егер пациент немесе оның заңды өкілі медициналық көмек көрсету кезінде денсаулығына немесе өміріне зиян келтірілді деп есептесе, медициналық ұйымға жүгінуге құқылы. Мұндай жағдайды тәуелсіз сараптама комиссиясы қарайды.

Комиссия құрамына бейінді мамандар, кәсіби медициналық қауымдастықтардың және Бірыңғай сақтандыру пулына қатысушы сақтандыру ұйымының өкілдері кіреді. Ал даулы жағдай орын алған медициналық ұйымның қызметкерлері комиссия құрамына енгізілмейді.

Сарапшылар медициналық құжаттарды және көмек көрсету жағдайларын зерделейді. Егер сақтандыру жағдайы расталса, төлем заңнамада белгіленген тәртіппен пациентке немесе оның заңды өкіліне сақтандыру компаниясы арқылы беріледі.

Бұл ретте пациент келтірілген зиянды медицина қызметкерінен тікелей өндіріп алуға міндетті емес. Сақтандыру төлемі медициналық ұйымның қаражаты есебінен жасалған шарт негізінде жүзеге асырылады.

Осылайша, міндетті сақтандыру тетігі пациентке расталған зиян үшін өтемақы алуға, ал медицина қызметкеріне кәсіби жауапкершілікке байланысты қаржылық тәуекелден қорғануға мүмкіндік береді.