Каспийдегі іздестіру операциясына 250-ден астам адам жұмылдырылды

Каспийдегі іздеу жұмыстарына 37 сүңгуір жұмылдырылды.  
Фото: ҚР Қорғаныс министрлігі телеграм

Үкіметтік комиссияның тапсырмасымен жүргізіліп жатқан жұмыстарға 252 әскери қызметші мен қызметкер, 34 арнайы техника, 37 әскери сүңгуір, 14 кеме мен катер және 20-дан астам әуе кемесі, оның ішінде төрт тікұшақ тартылған.

Жедел штаб құрамына Қорғаныс министрлігі, ҰҚК Шекара қызметі, Төтенше жағдайлар министрлігі, Ішкі істер министрлігі және Маңғыстау облысының жергілікті атқарушы органдарының өкілдері кірді. Іздестіру жұмыстарына оқиға орнында тікелей басшылықты Қорғаныс министрі, авиация генерал-лейтенанты Дәурен Қосанов жүргізіп жатыр.

Қазір су айдыны, жағалау және оған іргелес аумақтар әуеден үздіксіз бақыланып, тексерілуде. Сонымен қатар теңіздегі іздестіру жұмыстарына кемелер мен сүңгуірлер тартылған.

Еске салайық, оқу-жауынгерлік тапсырманы орындау кезінде ауа райы күрт нашарлап, желдің екпіні күшеюіне байланысты 17 әскери қызметші ашық теңізге кеткен. Жедел қабылданған шаралардың нәтижесінде үш әскери қызметші құтқарылды. Екі әскери қызметшіні іздеу жұмыстары әлі де жалғасып жатыр. Өкінішке қарай, 12 әскери қызметші қаза тапты.

Оқиға фактісі бойынша қылмыстық іс қозғалды. Арнайы комиссия оқиғаның себептері мен мән-жайларын анықтау үшін тергеу жұмыстарын жүргізіп жатыр. Қаза болғандардың отбасылары мен зардап шеккен әскери қызметшілерге қажетті материалдық және психологиялық көмек көрсетіледі.