Таиланд қазақстандықтарға елде визасыз жүру мерзімін өзгертті
Фото:depositphotos.com15 қыркүйектен бастап қазақстандықтар Таиландта визасыз 60 күн емес, 30 күн бола алады. Бұл ретте елде болудың жалпы мерзімі 180 күн ішінде 90 күнмен шектеледі, деп хабарлайды Tengri Travel.
Өзгерістер Қазақстан мен бірқатар басқа елдердің азаматтарына қатысты. Жаңа ережелер туралы Қазақстанның Таиланд Корольдігіндегі елшілігі хабарлады.
"Таиланд бірқатар мемлекеттің, соның ішінде Қазақстан Республикасы азаматтары үшін визасыз болу мерзімін 60 күннен 30 күнге дейін қысқартады. Таиланд Министрлер кабинетінің тиісті шешімі 2026 жылғы 15 қыркүйекте күшіне енеді", - деп атап өтті елшіліктегілер.
Жаңа ережелер күшіне енгеннен кейін қазақстандықтар Таиландта келген күннен бастап 30 күнтізбелік күнге дейін визасыз жүре алады. Бұл ретте болудың жалпы мерзімі әрбір 180 күндік кезең ішінде 90 күннен аспауы тиіс.
Яғни, жарты жыл ішінде Таиландқа жасалған бірнеше сапардың мерзімі жинақталады. Белгіленген жалпы лимиттен асуға болмайды.
Егер сапар 30 күннен асса, визасыз режим жеткіліксіз болады. Мұндай жағдайда тиісті визаны алдын ала ресімдеу қажет.
Таяу айларда Таиландта ұзақ демалуды немесе бірнеше рет баруды жоспарлап отырғандарға елшілік сапарды жоспарлау кезінде жаңа мерзімдерді ескеруді ұсынады.
Еске сала кетейік, 28 тамыздан бастап Таиландта шетелдіктерді депортациялаудың жаңа ережелері күшіне енді. Онда адамның елден қандай жағдайларда шығарылуы мүмкін екендігі көрсетілген. Жаңа ережелер Таиланд заңдарын бұзған немесе қоғамдық қауіпсіздікке қатер төндіруі мүмкін адамдарға қатысты.
