COVID қайта оралды ма: ДСМ жауап берді
Дәрігерлердің айтуынша, тіпті қарапайым ЖРВИ-дің өзі кейбір азаматтарда ауыр өтуі мүмкін
Фото: © istockphoto.com
Қазақстандықтар әлеуметтік желілерде симптомдары COVID-ке ұқсайтын аурудың таралып жатқанын айтып, шағымдануда. Нағыз белгілердің қатарында тамақтың ауыруы, жөтел, дәм мен иіс сезудің жоғалуы бар, деп хабарлайды Azattyq Rýhy.
Дәрігерлер азаматтарды өз бетінше диагноз қоймауға шақырады. Себебі қазіргі уақытта елде бір мезгілде бірнеше респираторлық вирус түрі қатар жүріп жатыр.
Денсаулық сақтау министрлігі тұрғындар арасында вирустық инфекциялардың күрт өсуі тіркелмегенін мәлімдеді. Мамандар қазіргі ахуалды әдеттегі маусымдық сипатқа ие деп бағалайды.
«Қазіргі уақытта халық арасында вирустық инфекциялардың өсуі байқалмайды. Біз маусымдық сырқаттанушылықты бақылап отырмыз. Зертханаларымыз анықтаған вирустардың арасында ерекше немесе қауіпті жаңа түрлері жоқ», — деді ДСМ Ұлттық қоғамдық денсаулық сақтау орталығы филиалының директоры Айнагүл Қуатбаева.
Қазіргі таңда риновирус, аденовирус, парагрипп және маусымдық коронавирустар сияқты маусымдық вирустар белсенді тіркелуде. Сонымен қатар COVID-19 жағдайлары да жүйелі түрде анықталып отырғанымен, жаңа қауіпті штамдардың пайда болу белгілері байқалған жоқ.
Дәрігерлердің айтуынша, тіпті қарапайым ЖРВИ-дің өзі кейбір азаматтарда ауыр өтуі мүмкін. Тәуекел тобына бір жасқа дейінгі балалар, жүкті әйелдер, қарттар және созылмалы ауруы бар жандар жатады. Мамандар ауру белгілері пайда болған жағдайда өз бетінше емделмей, медициналық көмекке жүгінуге кеңес береді.
