ЖРВИ ішіндегі ең қауіпті вирус - тұмау
Эпидемия маусымының бірінші аптасында елорда тұрғындары арасында ЖРВИ-дің 12 876 жағдайы тіркелсе, алдыңғы эпидемиялық маусымның осы кезеңінде 7 146 жағдай тіркелді. Бұл туралы Астана қаласының Коммуникациялар қызметінде өткен брифингте Астана қалалық санитарлық-эпидемиологиялық бақылау департаменті басшысының орынбасары Жанна Пралиева айтты, деп хабарлайды egemen.kz«Зертханалық зерттеулердің нәтижесі бойынша биыл эпидемиялық маусымда ЖРВИ, тұмау вирусы және covid-19 вирусы анықталған жоқ. Соңғы эпидемиялық маусымда 40 және 41 апта ішінде 14 науқаста В типті вирус анықталды. Қазіргі уақытта бокавирус (бір жағдай), синцитиальды вирус (екі жағдай), риновирус (алты жағдай) және кәдімгі коронавирус (бір жағдай) сияқты тұмау емес вирустардың айналымы анықталды. ЖРВИ-мен ауырған 12 876 жағдайдың ішінде қауіп тобына жататын науқастар 2% құрайды. Мектепке дейінгі мекемелерге баратын ұйымдасқан топтағы балалар арасында аурушаңдық 12 пайызды, ал мектеп оқушылары арасында 17 пайызды құрап отыр», деді Жанна Пралиева.
Ол жіті респираторлық вирустық инфекциялардың ішіндегі ең қауіптісі тұмау екенін айтты. А және В тұмауы вирустың маусымдық өсуін тудырады. А типті вирус адамдарға да, жануарларға да жұғуы мүмкін. Құс және шошқа тұмауы А тұмауының түрі болып табылады. Вирустың бұл түрі табиғатта эпидемияға айналған ауыр немесе орташа ауырлықтағы ауруларды тудырады. В типті вирус тек адамнан адамға жұғады. Бұл вирус түрі әдетте жергілікті сипатта болады және А типті тұмау эпидемияларының алдында немесе олармен қабаттасуы мүмкін.
Елордалық санитарлық-эпидемиологиялық бақылау департаменті басшысының айтуынша, екпе алу тұмаудың алдын алудың дәлелденген шараларының бірі.
«2023-2024 жылдардағы эпидемиялық маусымда маусымдық тұмауға қарсы иммундау үшін жергілікті бюджет қаражатынан Ресейде өндірілген «Гриппол плюс» вакцинасының 160 мың дозасы сатып алынды», деп түсіндірді спикер.
Жанна Пралиеваның айтуынша, осы жылдың 18 қыркүйегінде эпидемиялық көрсеткіштер бойынша инфекция жұқтыру қаупі жоғары тұлғаларға, оның ішінде медицина қызметкерлеріне, диспансерлік есепте тұрған балаларға, балалар үйлері мен балалар үйлерінің тәрбиеленушілеріне, облыстағы контингентке тұмауға қарсы егу науқаны басталды.
12 қазандағы жағдай бойынша жергілікті бюджет есебінен 82 232 адам егілді, бұл жалпы қала халқының 6 пайызын ғана құрайды. Тәуекел тобындағы адамдардың 51,5%-ы қамтылған, оның ішінде 14 жасқа дейінгі балалар – 16136, ересектер – 66096, оның ішінде медицина қызметкерлері – 9569 адам, жүкті әйелдер – 1650 адам. Сондай-ақ жұмыс берушілер есебінен 4627 ересек адам маусымдық тұмауға қарсы екпе алды.
