Ғалымдар отбасында нешінші болып туғаныңыз өміріңізге қалай әсер ететінін айтты

Австриялық психолог Альфред Адлер баланың отбасындағы реттік орны оның әдеттегі реакциялары өміріне қалай әсер ететінін түсіндірді. Айтуынша, үлкен бала, яғни тұңғыш көбіне ерте жастан өз бетінше әрекет етуге үйренеді. Отбасына кіші бала қосылғаннан кейін ол тәртіпті, сенімді болуға және жетістіктері арқылы мақтауға лайық екенін дәлелдеуге тырысады. Осыдан перфекционизм, тәртіпке деген сүйіспеншілік және бәрін бақылауда ұстауға деген ұмтылыс қалыптасуы мүмкін.

Қызығы, әлемдегі басшылардың шамамен 80 пайызы – тұңғыш балалар. Огайо мемлекеттік университетінің зерттеулері де тұңғыштардың саяси көшбасшы болуға және ата-анасы жүзеге асыра алмаған армандарды орындап, отбасылық істі жалғастыруға бейім екенін көрсетеді.

Дегенмен сарапшылардың айтуынша, ата-аналар үлкен баланы кіші балаларға күтуші етіп қоймауы керек. Ересектермен бірдей жауапкершілік жүктеу оның балалық шағын толыққанды өткізуіне кедергі келтіруі мүмкін.

Ортаншы бала келіссөз жүргізіп, түрлі жол іздеуге үйренеді. Ол бір жағынан үлкенінің мүддесін ескерсе, екінші жағынан кішінің назар үшін бәсекесіне тап болады. Мұндай жағдай оның икемді, көпшіл болуына және ымыраға келе білуіне ықпал етеді.

Кіші балаға әдетте көбірек нәрсеге рұқсат беріледі әрі қателіктері де ұзақ уақыт кешіріледі. Ол батыл әрі шығармашыл болып өсуі мүмкін. Бірақ көбіне өзгелерден көмек іздеуге бейім болады. Жасына сай міндеттер жүктеу оған өз бетінше шешім қабылдауды үйренуге көмектеседі.

Жүктілік кезінде шай ішу баланың зияткерлік қабілетіне әсер етеді – Ғалымдар

Жалғыз бала көп уақытын ересектердің арасында өткізеді. Сондықтан олардың сөйлеу мәнері мен мінез-құлық ережелерін тезірек қабылдайды. Ол үнемі толық назарда болуға үйренетіндіктен, құрдастарымен қарым-қатынас жасауы әсіресе маңызды.

Бұл ерекшеліктерді түсіну ата-аналарға балаларын бір-бірімен салыстырмай, әрқайсысына өзіне жетіспейтін қолдауды көрсетуге көмектеседі.