Астанадағы жәрмеңке: Қарағанды мен Қызылорда облыстары мың тоннаға жуық өнім әкеледі
Елордадағы жәрмеңкеге Қарағанды мен Қызылорда облыстары мың тоннаға жуық ауылшаруашылық өнімін әкеледі, деп хабарлайды ҚазАқпарат қала әкімдігінің сайтына сілтеме жасап. Алдағы демалыс күндері Астана қаласының 20 жылдығына орай Қарағанды және Қызылорда облыстары шаруаларының ауылшаруашылық жәрмеңкесі өтеді.
Өңірлік ауыл шаруашылығы тауарын өндірушілер жалпы алғанда шамамен 1 000 тонна өнім әкелуді жоспарлап отыр, соның ішінде ет және ет өнімдері, сүт өнімдері, жұмыртқа, балық, көкөніс, жемістер және т. б.
Жәрмеңке «Қазақстан» спорт кешенінің жанындағы алаңда өтеді. Онда ауыл шаруашылығы тауарын өндірушілер және «Корпорация Қарағанды - НАН», «Нәтиже Сүт Фабрикасы» ЖШС, «Еуразиан Фудс» АҚ, «Бидай НАН» ЖШС, «Фирма Тұлпар» ЖШС секілді өңірлік компаниялар өз өнімдерін әкеледі.
Жәрмеңке аясында бауырсақ және қымыз фестивалі сондай-ақ, облыстардың шығармашылық ұжымдары концерт қояды.
