Қазақстандықтардың жеке деректерін сатып келген адамдар ұсталды
Фото: freepik
Қазақстанның ірі қалаларында азаматтардың құпия деректерін заңсыз таратты деген күдікке ілінген қыдмыстық топ анықталды, деп хабарлайды MadeniPortal.kz.
Ұлттық қауіпсіздік комитетінің баспасөз қызметінің мәліметінше, биылғы жылдың наурыз айында Астана мен Алматы қалаларында Қазақстан азаматтарының жеке деректерін жинау және таратуға байланысты заңсыз әрекеттер әшкереленген.
«Тергеу материалдарына сәйкес, қылмыстық іс фигуранттары интернет желісінде заңсыз жолмен алынған ақпаратты сатып отырған. Сатып алушылар қатарында кейбір микроқаржы ұйымдары мен коллекторлық агенттіктердің өкілдері, сондай-ақ жеке тұлғалар болған», деп мәлімдеді ҰҚК.
Ведомствоның хабарлауынша, тінту барысында компьютерлік техника, электронды ақпарат тасымалдағыштар, ірі көлемдегі ақша қаражаты және өзге де заттай дәлелдемелер тәркіленген.
Қазіргі уақытта Қылмыстық кодекстің 147, 208 және 210-баптары бойынша сотқа дейінгі тергеп-тексеру жүргізілуде.
