Қазақстанда алдағы төрт жылда бес мың шақырым жаңа теміржол салынады
Соңғы 15 жылда көлік саласына шамамен 35 млрд доллар қаражат салынды
Фото: istockphoto.com
Фото: istockphoto.com
Қазақстанда алдағы төрт жылда бес мың шақырым жаңа теміржол салынатын болды. Бұл туралы Теміржол ынтымақтастығы ұйымының 70 жылдығына арналған конференцияда премьер-министр Олжас Бектенов мәлім етті, деп хабарлайды Azattyq Rýhy.
Форумға әлемнің 30-дан астам елінен 300-ден астам теміржол тасымалы компанияларының басшылары мен өкілдері келді. ТЖЫҰ ұзындығы 320 мың шақырымнан асатын теміржол желісін қамтиды, олар арқылы жыл сайын шамамен 5,5 млрд жолаушы және 5 млрд тонна жүк тасымалданады
Өз сөзінде ол еліміздің транзиттік әлеуетін одан әрі арттыруға назар аударды.
«Біздің ортақ мақсатымыз – Еуразияны біртұтас әрі үздіксіз жұмыс істейтін көлік жүйесіне айналдыру. Қазақстан – жаһандық мұхитқа тікелей шығар жолы жоқ әлемдегі ең ірі мемлекет. Бірақ біз осы географиялық ерекшелікті стратегиялық артықшылығымызға айналдыру бағытында жұмыс істеп жатырмыз. Соңғы 15 жылда біз көлік саласына шамамен 35 млрд доллар қаражат салдық. 2,5 мың шақырымнан астам жаңа магистральдық жолдар салынды. Бүгінде «Батыс Еуропа – Батыс Қытай» бағыты бойынша барлық құрлықтағы транзиттік тасымалдардың 85%-ға жуығы Қазақстан арқылы өтеді. Бірақ мұнымен тоқтап қалмаймыз. Алдағы 4 жылда тағы 5 мың шақырым жаңа теміржол салуды жоспарлап отырмыз. Біздің мақсатымыз – 2035 жылға қарай транзит көлемін жылына 100 млн тоннаға дейін жеткізу», – деді премьер-министр.
