"Жауын-шашын, найзағай": 18-20 сәуірге арналған ауа райы болжамы
Республика бойынша түнгі және таңғы уақытта тұман түсуі ықтимал.
Синоптиктер 18-20 сәуір күндеріне арналған ауа райы болжамын жариялады. Елдің бір бөлігінде күн ашық әрі салқындау болса, батыс пен оңтүстікте жауын-шашын, найзағай және желдің күшеюі мүмкін, деп хабарлайды KYN.KZ ақпарат агенттігі хабарлайды.
Елімізде 18-20 сәуір күндері ауа райы құбылмалы болады. Синоптиктердің мәліметінше, елдің солтүстік, шығыс және орталық өңірлерінде жауын-шашын күтілмейді. Алайда салқын ауа райы сақталады.
Ал батыс пен оңтүстік аймақтарда тұрақсыз ауа райы күтіледі. Бұл өңірлерде жаңбыр жауып, найзағай ойнауы мүмкін. Оңтүстік облыстардың таулы аудандарында жаңбыр аралас қар түсіп, жел күшеюі ықтимал.
Сондай-ақ республика бойынша түнгі және таңғы уақытта тұман түсу қаупі бар. Температуралық көрсеткіштерге келсек, күндіз батыс, солтүстік және орталық өңірлерде ауа температурасы 15-23°C-қа дейін жылынады. Шығыста 10-18°C жылы болса, оңтүстік және оңтүстік-шығыста 17–28°C аралығында болады.
