Қазақстанды дауыл мен көктайғақ қатар қыспаққа алды

Фото: freepik.com © jplenio1

Бірқатар өңірде нөсер жаңбыр, найзағай, бұршақ, дауыл және қатты жел болжанып отыр. Сонымен қатар кей аймақтарда көктайғақ, тұман және су деңгейінің көтерілу қаупі сақталады. Синоптиктердің мәліметінше, Түркістан, Жамбыл, Алматы және Жетісу облыстарының таулы және тау бөктерлі аудандарында қатты жауын-шашын күтіледі. Желдің екпіні кей жерлерде 30 м/с және одан да жоғары болуы ықтимал. Бірқатар өңірде бұршақ пен дауыл қатар жүреді. Ал солтүстік және шығыс аймақтарда жағдай одан да күрделірек. Шығыс Қазақстан мен Абай облыстарында жауын-шашын жаңбыр мен қарға ұласып, көктайғаққа әкеледі. Кей жерлерде тұман түсіп, жол қозғалысын қиындатуы мүмкін. Ертіс өзеніндегі су деңгейі қауіпті межеге жақындап, кей бекеттерде одан асып кеткен. Семей маңында су деңгейі 424 см-ге жетіп, қауіпті шекке (450 см) таяп тұр. Ал Шығыс Қазақстандағы бір гидробекетте су деңгейі қауіпті көрсеткіштен асып кеткен. Мамандар су тасқыны қаупі барын жоққа шығармайды. Орталық және батыс өңірлерде де ахуал тұрақсыз. Қарағанды, Ұлытау, Ақтөбе облыстарында жауын-шашын қармен араласып, жолдарда көктайғақ пайда болады. Батыс Қазақстан, Атырау және Маңғыстау облыстарында тұман жиілеуі мүмкін. Қызылорда облысында шаңды дауыл, желдің күшеюі және найзағай күтіледі. Ал кей өңірлерде жоғары өрт қаупі сақталып отыр, бұл табиғи апаттардың қатар жүру қаупін арттырады.