Көлік салығын қалай есептеп, төлеуге болады?

Қазалы ауданы бойынша Мемлекеттік кірістер басқармасы Қазақстан Республикасының Салық кодексінің 566-бабына сәйкес, көлік құралдарына салынатын салықты салық төлеуші өз бетінше есептейтінін хабарлайды.

Салық сомасын келесі тәсілдер арқылы есептеуге болады:

- Мемлекеттік кірістер комитетінің kgd.gov.kz порталындағы «Көлік салығын есептеу» электрондық сервисі арқылы;

- «e-Salyq Azamat» мобильді қосымшасындағы «Калькуляторлар» бөлімінде.

Есептеу үшін келесі мәліметтерді көрсету қажет:

- салық есептелетін жыл – 2025 жыл;

- көлік құралын нақты иеленген айлар саны;

- көлік құралының түрі;

- қозғалтқыш көлемі.

Салық мөлшерлемесі айлық есептік көрсеткіштің (АЕК) мөлшеріне және көлік құралы қозғалтқышының көлеміне байланысты белгіленеді.

Бұл ретте салықты есептеу кезінде тиісті қаржы жылының 1 қаңтарындағы қолданыстағы АЕК мөлшері қолданылады.

Мысалы, 2025 жылға арналған көлік салығын есептеу үшін 1 АЕК – 3 932 теңге мөлшерінде алынады.

Көлік құралдарына салынатын салық жеке тұлғаның тұрғылықты жері бойынша төленеді.

Банктер немесе банкоматтар арқылы төлем жасаған кезде келесі деректемелерді көрсету қажет:

- бюджеттік сыныптама коды (БСК) – 104402;

- төлем мақсатының коды (ТМК) – 911;

- өсімпұл үшін ТМК – 912.

Жеке тұлғалардың 2025 жылға арналған көлік салығын төлеу мерзімі – 2026 жылғы 1 сәуірден кешіктірілмей.

Мемлекеттік кірістер басқармасы салық төлеу әрбір азаматтың конституциялық міндеті екенін еске салады және салық міндеттемелерін уақытылы орындауға шақырады.

Көлік иесі болу — тек рөлге ие болу емес, сонымен қатар ортақ тәртіпке бағыну. Салық төлеу арқылы біз жайлы әрі қауіпсіз болашақты бірге қалаймыз.