Наурыз келді, құт келді
Наурыз дәстүрлік құндылықтардың жаңғырып, шаттық пен береке, бірлік пен татулықтың ұлықталатын кезі. «Гауһар-Тас-2» балабақшасында наурызнама онкүндігі аясында Көрісу күні ерекше сән-салтанатпен аталып өтті. Бұл күні ата-бабамыздан келе жатқан ізгі амалмен балаларымыз ата-аналарды жылы қарсы алып, көрісу рәсімін көрсетті.Балаларға ұлттық салт-дәстүрімізді таныстыру, үлкенге құрмет, кішіге ізет көрсетуге тәрбиелеу және қазақ халқының өнегелі жолын насихаттайтын құндылықтарын дәріптеуді мақсат тұтқан шарада тәрбиеленушілер «Бір жасыңмен!», «Жасың құтты болсын!» деп көрісіп, ұлттық дәстүрдің мән-мағынасын түсінуге мүмкіндік алды. Ән, тақпақтар айтып, келген ата-аналармен бірге жылы жүздесіп, мерекелік көңіл-күй сыйлады. Ата-аналар да бұл тәрбиелік мәні зор өнегеге ризашылықтарын білдірді.
Осындай ұлттық құндылықтарға негізделген іс-шаралар арқылы балабақшамызда жас ұрпаққа салт-дәстүрімізді құрметтеу, ұлттық рухта тәрбиеленуге үлкен мән беріледі.
– Қайырымдылық күніне орай игі іс-шара ұйымдастырылды. Балабақша ұжымы мен ата-аналардың бірлесе қолдау көрсетуінің нәтижесінде көмекке мұқтаж үш отбасыға азық-түлік себеттері табысталды.
Шараның негізгі мақсаты – балаларға мейірімділік пен жанашырлық қасиеттерін дарыту, қайырымдылық пен қамқорлықтың маңызын түсіндіру, қоғамдағы бірлік пен татулықты нығайту. Сонымен қатар, ата-бабамыздан келе жатқан жақсылық жасау дәстүрін жалғастырып, мұқтаж жандарға қолдау көрсету арқылы адамгершілік құндылықтарды дәріптеу көзделді.
Бұл игі іске балабақша қызметкерлері мен ата-аналар белсенді атсалысып, өз үлестерін қосты. Нәтижесінде отбасыларға қажетті азық-түлік жеткізіліп, олардың қуанышына себеп болды.
Бірлік пен ізгілікті насихаттайтын мұндай игі істер алдағы уақытта да өз жалғасын таба бермек.
Тұрсынай ЕШМАҒАНБЕТ,
балабақша меңгерушісі
