Қар, тұман, екпінді жел: елдің басым бөлігінде дауылды ескерту жарияланды

Фото: istockphoto.com

20 ақпанда Қазақстанның басым бөлігінде боран, қар, тұман және көктайғақ күтіледі, деп хабарлайды Azattyq Rýhy. 

«Қазгидромет» болжамынша, ел аумағында ауа райы күрт құбылып, жел күшейіп, жауын-шашын аралас түседі.

Астанада түнде және таңертең тұман күтіледі.

Ақмола облысының батысында, солтүстігінде және шығысында тұман болады. Шығыс, оңтүстік-шығыстан соғатын желдің екпіні күндіз 15–20 м/с-қа жетеді.

Ақтөбе облысында түнде жауын-шашын, боран, көктайғақ болжанады. Өңірдің батысы мен солтүстігінде қатты қар жауады. Күндіз жаңбыр мен қар түріндегі жауын-шашын түсіп, жаяу бұрқасын соғады. Жел екпіні кей жерлерде 23–28 м/с-қа дейін күшейеді.

Ұлытау облысының батысы мен солтүстігінде күндіз жаңбыр мен қар жауып, жаяу бұрқасын болады. Кей аумақтарда тұман мен көктайғақ қалыптасады. Солтүстік-шығыстан, өңірдің бірқатар бөлігінде шығыстан соғатын желдің жылдамдығы 15–20 м/с.

Қарағанды облысында жолдарда көктайғақ болады. Солтүстігі, оңтүстігі және шығысында тұман түседі. Жел екпіні 15–20 м/с-қа дейін жетуі ықтимал.

Жамбыл облысында оңтүстік-батыстан соғатын желдің екпіні 23–28 м/с-қа дейін күшейеді. Таулы аудандарда жел жылдамдығы 30 м/с және одан да жоғары болуы мүмкін.

Абай облысының шығысы, оңтүстігі және орталығында түнде қар, кей уақытта қатты қар, боран және көктайғақ күтіледі. Батысында тұман түседі. Жел 15–20 м/с, түнде екпіні 23 м/с-қа дейін жетеді.

Қызылорда облысының солтүстігінде түнде көктайғақ қалыптасады. Өңірдің орталығы, солтүстігі және оңтүстігінде тұман болады. Солтүстік-шығыс желі 15–20 м/с жылдамдықпен соғады.

Қостанай облысының батысы мен оңтүстігінде күндіз жаңбыр мен қар түріндегі жауын-шашын, боран және көктайғақ күтіледі. Бірқатар аумақта тұман түседі. Желдің жылдамдығы 15–20 м/с.

Шығыс Қазақстан облысында түнде қар, боран және көктайғақ болжанады, шығысы мен оңтүстігінде кейде қатты қар жауады. Күндіз солтүстігі мен шығысында аз қар, жаяу бұрқасын және көктайғақ болады. Жел 15–20 м/с, түнде екпіні 23 м/с-қа жетеді.

Атырау облысында жауын-шашын, жаяу бұрқасын және көктайғақ күтіледі. Түнде солтүстігінде қатты жауын-шашын болуы мүмкін. Жел бағыты ауысып, екпіні 15–20 м/с-қа дейін күшейеді.

Павлодар облысының оңтүстігінде тұман болжанады.

Батыс Қазақстан облысында жаңбыр мен қар аралас жауын-шашын, жаяу боран және көктайғақ күтіледі. Кей аумақтарда қатты жауын-шашын түседі. Жел 15–20 м/с-қа дейін күшейеді.

Түркістан облысының солтүстігі мен таулы аудандарында күндіз жаңбыр жауады. Өңірдің бірқатар бөлігінде тұман түседі. Жел 15–20 м/с жылдамдықпен соғады.

Маңғыстау облысының солтүстігі мен оңтүстігінде тұман күтіледі. Жел екпіні кейде 23 м/с-қа дейін жетеді.

Солтүстік Қазақстан облысының оңтүстігінде тұман болады. Күндіз жел екпіні 15–20 м/с, кей жерлерде 25 м/с-қа дейін күшеюі мүмкін.

Алматы облысының солтүстігі, оңтүстігі және таулы аудандарында түнде және таңертең тұман түседі. Желдің жылдамдығы 15–20 м/с.

Жетісу облысының орталығы мен таулы аймақтарында да тұман күтіледі. Алакөл маңында жел 15–20 м/с, кейде 23–28 м/с-қа дейін жетуі ықтимал.

Синоптиктер жол қозғалысына қатысушылар мен алыс жолға шығатын азаматтарды сақ болуға шақырады. Ауа райының күрт құбылуы көлік қозғалысына және жаяу жүргіншілер қауіпсіздігіне тікелей әсер етуі мүмкін.