Қазақстанда алаяқтардың құрбандарына арналған бірыңғай база жасалады
ShutterstockБайланыс операторлары алаяқтыққа қарсы дерекқор қалыптастырмақ. SMARTNEWS.KZ басылымының хабарлауынша, Қазақстанда байланыс операторлары телефон алаяқтарының құрбандары мен ықтимал жәбірленушілеріне қатысты арнайы дерекқор қалыптастырады.
Бұл тетік Қазақстан Республикасының Ұлттық Банкі жанындағы Ұлттық банктің Антифрод-орталығы өкілеттігін кеңейту арқылы енгізілмек. Тиісті қаулы жобасы «Ашық НҚА» порталында жарияланып, қазір көпшілік талқылауына шығарылды. Ұлттық банк бастамасы қаржы нарығындағы алаяқтыққа қарсы күресті күшейтуге, сондай-ақ қылмыстық жолмен алынған кірістерді заңдастыру мен терроризмді қаржыландыруға тосқауыл қоюға бағытталған. Құжат жобасына сәйкес: Антифрод-орталыққа қатысатын ұйымдардың құрамы кеңейтіледі және олармен өзара іс-қимыл тәртібі бекітіледі; Антифрод-орталықтың қосымша дерекқорларын қалыптастыру және жүргізу қағидалары айқындалады; Антифрод-орталық қатысушыларының өзара әрекет ету алгоритмдері енгізіледі, соның ішінде: – бір адамның бірнеше несиеге қатар өтініш беру жағдайлары бойынша; – алаяқтық белгілері бар қоңыраулар жасалған абоненттік нөмірлерді анықтау кезінде ұялы байланыс операторларының әрекеті; – байланыс операторларының үшінші тұлғалардың алаяқтық әрекеттерінен зардап шегуі мүмкін азаматтардың бірыңғай базасын қалыптастыруы. Сонымен бірге жобаға қаржы нарығын, байланыс саласын және банкроттықты реттеуге қатысты бірқатар заңдардың қабылдануына, сондай-ақ Цифрлық кодекстің енгізілуіне байланысты редакциялық және үйлестіруші түзетулер енгізілген. Ұлттық банктің мәліметінше, бұл өзгерістер қаржы секторындағы алаяқтық операциялардың санын қысқартуға және күмәнді транзакциялар тәуекелін төмендетуге мүмкіндік береді. Қаулы жобасы 2026 жылғы 3 наурызға дейін қоғамдық талқылауда болады.
