Жолда абай болыңыз: бүгін елімізде қай жолдар жабық тұр
Республикалық маңызы бар жолдарда қозғалысқа шектеу енгізілді
Фото: © istockphoto.com
Еліміздің бірнеше өңірінде ауа райының қолайсыздығы мен жөндеу жұмыстарына байланысты республикалық маңызы бар жолдарда қозғалысқа шектеу енгізілді, деп хабарлайды Azattyq Rýhy.
«ҚазАвтоЖол» ұлттық компаниясы 8 ақпандағы соңғы мәліметтерді ұсынды.
Ауа райының нашарлауына байланысты «РФ шекарасы – Мәртөк – Ақтөбе – Қарабұтақ – Қызылорда – Шымкент – Тараз – Қордай – Алматы – Қорғас – ҚХР шекарасы» жолының бір бөлігі жабылды.
Учаске: 159-238 шақырым (Кенен ауылынан Қайнар ауылына дейін, Қордай асуының жаңа айналма жолы).
Ескерту: Көлік қозғалысы ескі Қордай асуы арқылы жүзеге асырылуда.
«Астана — Шідерті — Павлодар — Успенка — РФ шекарасы» автожолындағы көпір өткелінің шеткі арқалықтары зақымдануына байланысты «Қалқаман» жол айрығы учаскесі – Қалқаман ауылына кіреберіс және Астана бағытына шығатын жол жабылды.
Ал Осинов асуында тіркемесі бар және жартылай тіркемелі жүк көліктерінің қозғалысы уақытша шектелді.
