Ауданның энергетикалық әлеуеті артуда
Қазалы ауданы соңғы жылдары инфрақұрылымдық әлеуетін арттыруға бағытталған ауқымды бастамаларды жүйелі түрде жүзеге асырып келеді. Әсіресе, тұрғындарды сапалы әрі үздіксіз электр энергиясымен қамту мәселесі өңірдің әлеуметтік-экономикалық дамуы үшін негізгі басым бағыттардың бірі саналады. Осы мақсатта биыл облыс әкімі Нұрлыбек Нәлібаевтың қолдауымен ауданда жалпы құны 2,4 миллард теңгені құрайтын үш ірі жоба қолға алынып, энергетикалық инфрақұрылымды жаңғырту жұмыстары кең көлемде жүргізілуде.Бұл жобалар жаңа қоныстану аймақтарының қажеттілігін қамтамасыз етіп қана қоймай, ауданның энергиямен жабдықтау жүйесін күшейтуге, кәсіпкерліктің дамуына және әлеуметтік нысандардың тұрақты жұмыс істеуіне тікелей ықпал етеді. Сол бастамалардың бірі – Әйтеке би кенті мен Қазалы қаласының арасындағы жаңадан игерілген кварталдарға қажетті электр қуатының жеткізілуін қамтамасыз ету мақсатында салынып жатқан жаңа қосалқы станса құрылысы.
Аудан әкімі құрылыс жұмыстарының барысымен танысу үшін Әйтеке би кентіндегі нысанға барып, мердігер мекеме – «Энергомера» ЖШС-нің жауапты өкілдерімен кездесті. Бүгінгі таңда қосалқы станса аумағында бірқатар нақты жұмыстар атқарылған. Атап айтқанда, фундаменттік блоктар толық орнатылып, 32 дана темір-бетон бағаналары тұрғызылды. Сонымен қатар 4 шақырымдық ВЛ-35 кВ әуе желісі тартылып, 110 метр аумақ қоршалды.
Биыл жоспарланған қаржы толық игеріліп, құрылыс-монтаж жұмыстарының 45 пайызы орындалған. Нысанның құрылысымен жан-жақты танысқан аудан басшысы жаңа қосалқы стансаның іске қосылуы нәтижесінде Әйтеке би кенті мен Қазалы қаласы арасындағы жаңа тұрғын кварталдарын сенімді, сапалы және тұрақты электр қуатымен қамтамасыз ету мүмкіндігі айтарлықтай артатынын атап өтті. Сондай-ақ маңызды жоба аймақтағы әлеуметтік мекемелер мен кәсіпкерлік нысандарының электр энергиясына деген сұранысын өтеуге, инфрақұрылымдық дамуға серпін беретінін жеткізді.
Аудан әкімі мердігер компания мен жауапты сала өкілдеріне құрылыс сапасын мұқият бақылауда ұстап, жобаның мерзімінде әрі талапқа сай аяқталуын қамтамасыз етуді тапсырды. Аталған нысан – тұрғындардың әл-ауқатын жақсартып, ауданның энергетикалық тұрақтылығын арттыруда айрықша рөл атқаратын ауқымды жоба.
Айта кетейік, Қазалы ауданында бұл жобаға қосымша ретінде Қазалы қаласының электр желілерін толықтай жаңғырту жұмыстары, сондай-ақ «Ауыл – ел бесігі» бағдарламасы аясында Қожабақы ауылындағы электр желілерін қайта құру шаралары да жүзеге асырылуда. Осы жұмыстар нәтижесінде жыл соңына дейін аудан бойынша электр желілерінің тозу деңгейін 69 пайыздан 67 пайызға дейін төмендету жоспарланып отыр.
Арайлым ЖҮСІПОВА
