Депутат мектептерде смартфон қолдануға шектеу енгізуді ұсынды
Фото: unsplash.comМәжіліс депутаты Асхат Аймағамбетов мектептерде смартфон қолдануға шектеу енгізуді ұсынды.
Депутаттың айтуынша, НИШ пен БИЛ секілді алдыңғы қатарлы білім ордалары ұялы телефонды қолдануға шектеулер қойған. Бұл басқа мектептерге де үлгі болуы тиіс.
«Назарбаев Зияткерлік мектептері, Білім-Инновация лицейлері және тағы да бірқатар алдыңғы қатарлы білім ордалары мектеп ішінде смартфон қолдануға шектеу енгізді. Басқа мектептер ше? Неліктен осы қадамға бармай отыр? Заң жүзінде біз оларға мұндай мүмкіндік бердік. Зерттеулер жеткілікті. Көшбасшылық деген - дәл осындай кезде көрінеді. Қиын болса да, дұрыс шешім қабылдау. Өйткені бұл - оқушының зейіні, денсаулығы, мінезі және тәртібі туралы мәселе», - деді депутат.
Айта кетейік, 2025 жылғы 1 қыркүйектен бастап барлық Назарбаев Зияткерлік мектептері оқушыларына смартфондар, планшеттер және смарт-сағаттар сияқты құрылғыларды пайдалануға тыйым салатынын айтқан.
НИШ бұл шешім халықаралық зерттеулерге негізделгенін атап көрсетеді. Енгізілген ережеге сәйкес, смарт-құрылғыларды сабақ кезінде де, үзілістерде де пайдалануға болмайды.
Ата-аналармен байланыс қажет болған жағдайда оқушыларға кнопкалы телефон немесе мектептегі стационарлық телефон арқылы байланысу мүмкіндігі қарастырылған.
