Оқу-ағарту министрі жекеменшік мектептердің қаржыландыру тәртібін түсіндірді
Жекеменшік мектептерге қаржы бөлу құзыреті әкімдіктерге беріледі
Фото: Freepik
Фото: Freepik
Оқу-ағарту министрі Жұлдыз Сүлейменова жекеменшік мектептерді қаржыландыру жүйесінде өзгеріс болатынын айтты, деп хабарлайды Azattyq Rýhy.
«Жекеменшік мектептерге 2025 жылға дейін республикалық бюджеттен қаржы берілді. Бюджет кодексіне енгізілген өзгерістерге сәйкес, әр оқушыға бөлінетін қаражат жергілікті биліктің құзырына өтеді. Сондықтан екі жақтан қаржыландыру болмас үшін, 2025 жылдан бастап жекеменшік мектептерді қаржыландыру жергілікті бюджет есебінен жүзеге асырылуы тиіс деген шешім қабылданған еді», - деді министр.
Министрдің сөзінше, маусым айында Қаржы орталығы жекеменшік мектептерден өтінім қабылдау жүйесін іске қосуы тиіс болған. Бұл өтінім арқылы лицензиясы бар және оқу процесін жүргізіп отырған мектептер құжаттарын тапсыруы керек еді. Өтінімдер 60 күн ішінде қаралуы жоспарланған, бірақ жүйе маусым айында ашылмаған.
«Сол себепті жаңа оқу жылы басталған кезде көптеген жекеменшік мектептер өздеріне тиесілі қаржыны ала алмады. Мен қызметке келгеннен кейін, 29 қыркүйекте бірқатар мектеп өкілдерімен кездесіп, бұл мәселені Премьер-Министр деңгейінде көтердік», - деді Сүлейменова.
Оның мәліметінше, былтыр мемлекеттік тапсырыс арқылы 745 жекеменшік мектеп қаржыландырылса, биыл олардың саны 917-ге жеткен. Яғни, 149 жаңа мектеп қосылған.
«Біз барлық қаржыны егжей-тегжейлі есептедік. Қай мектеп жергілікті атқарушы органдардан, қайсысы республикалық бюджет есебінен қаржыландырылатыны нақтыланды. Қазір пилоттық жоба бойынша бұйрық дайындалды. Ол бекітілгеннен кейін алдағы күндері қаражат аударылады», – деді министр.
Сүлейменованың айтуынша, пилоттық жоба аясында әкімдіктердің де жауапкершілігі артады.
«Министрлік бұйрыққа қол қойғаннан кейін жергілікті органдар төлем жасауды кешіктірмеуі керек. Сол үшін әкімдіктер де құжатқа қол қойып, өз міндеттемесін ресми түрде бекітеді. Мемлекеттің барлық міндеттемелері толық орындалады», - деп түйіндеді министр.
