Қазалыда "Қалқан - 2025" арнайы-тактикалық оқу-жаттығуының қорытынды шарасы өтті

Бүгін аудан әкімі Алмасбек Есмахановтың қатысуымен Басықара ауылындағы Ә.Тыныбаев атындағы Қазалы су торабында оқу-жаттығудың негізгі шарасы өтті. Шарада ауданның аумақтық қорғаныс батальонының ротасы су торабын жарылғыш зат қойып, оны жоюға келген содырлармен қақтығысты. Нәтижесінде әскери операция сәтті аяқталып, рота нысанды сақтап қалды.

Әскери шарада аудан басшысы 10 күнге созылған оқу-жаттығу кезінде ауданның аумақтық қорғаныс батальонына әдістемелік көмек көрсеткен азаматтарға және әскери міндеттерін адал атқарып, әскери тәртіп пен жауынгерлік даярлықта жоғары нәтиже көрсеткен сарбаздарға алғысын жеткізді.

- Әлемдегі қазіргі геосаяси жағдайды ескеріп, әскери жиындардан өту әрбір қазақстандық үшін қажет және елдің қорғаныс қабілетін нығайтуға қатысуы тиіс. Оқу-жаттығудың негізгі мақсаты – елдегі қауіп-қатерлерге дайындықты тексеру. Шынығу, дайындалу, тәжірибе алу. Мұндай әскери жиындар – жай ғана әскери дайындық емес, әскери міндеттілер арасында бірлікті, үйлесімділікті және жауапкершілікті нығайтудың құралы десек болады. Әрбір қатысушы ұлттық қауіпсіздік жүйесіндегі өз рөлінің маңызын түсінеді. Мұндай шаралар азаматтардың кез келген қатер жағдайында әрекет етуге дайын болуының кепілі болары анық. Оқу жаттығу кезеңінде Қазалы ауданының аумақтық қорғаныс батальоны соғыс жағдайы кезеңінде аудан тұрғындарын, аумақтық қорғаныс объектілері мен оның аумағын қарсыластың әрекеттерінен қорғау мақсатында үлкен практикалық және теориялық тәжірибе жинады деп санаймын,- деді Алмасбек Әбілқасымұлы.

Әскери жиынның қорытындысымен оқу жаттығу кезеңінде сарбаздарға әдістемелік көмек көрсеткен азаматтар мен сарбаздар аудан әкімінің және облыс әкімінің бірінші орынбасарының, Қызылорда облысының жұмылдыру дайындығы, аумақтық және азаматтық қорғаныс басқармасының «Алғыс хаттарымен» марапатталды. Сонымен қатар оқу-жаттығуға қатысқан сарбаздарға арнайы кезекті әскер шендер табысталды.

Жиында Қызылорда облысы әкімінің әскери қауіпсіздік және қорғаныс мәселелері жөніндегі көмекшісі Нұрболат Сейітов пен №99215 әскери бөлімінің командирі Шайзатхан Абжапбаров алдағы уақытта да аудан аумағында мұндай жиындар жалғасын табатындығын айтып, оқу – жаттығуы кезінде белсенділік танытқан азаматтарға алғыстарын жеткізді.