Ауылдан шыққан арлан
«Балаңды спортқа бер, шынықсын, шымыр болсын» деген сөздің астарында үлкен өмірлік мән жатыр. Шынымен шыдамның, табандылық пен тәртіптің мектебі саналатын спорт – жас ұрпақтың рухын шыңдайтын, ел намысын биіктететін қасиетті сала. Осындай спорт жолына түскен жас өрендердің бірі – Жанкент ауылындағы №104 орта мектептің 10-сынып оқушысы Ермұхаммед Іскендір.Ермұхаммед – бала жастан белдесуге бейім, күрес өнеріне ынтық болған жас. Уақыт өте келе ол өз қабілетін жетілдіріп, ауылдағы спорт залдың тұрақты тәрбиеленушісіне айналды. Бүгінде ол грек-рим күресінен зор жетістіктерге жетіп жүр.
Жас балуанның табысқа жету жолында оның жаттықтырушылары – Әлизақ Мейірман мен Кеңшілік Есмұрзаевтың еңбегі ерекше. Олар Ермұхаммедтің бойындағы қайсарлық пен еңбекқорлықты дер кезінде танып, жүйелі жаттығу арқылы оны үлкен спортқа баулыды
Ұстаздарының ұдайы еңбегі мен Ермұхаммедтің табандылығының арқасында ол бүгінде Қызылорда облысының бес дүркін чемпионы атанып отыр. Бұған қоса, республикалық деңгейдегі бірнеше жарыстардың жеңімпазы және жүлдегері атанған.
2025 жылдың 12 тамызы – Ермұхаммедтің спорттық өміріндегі ең есте қалар күндердің бірі. Сол күні Қостанай облысы, Денисов ауданында ауыл спортшылары арасында өткен грек-рим күресінен Қазақстан Республикасы чемпионатында 45 келі салмақ дәрежесінде ол қарсыластарын қапы қалдырып, жеңімпаз атанды.Жерлестері үшін бұл жаңалық ауыл спортының биігін айқындап, жасөспірімдерге үлкен шабыт сыйлады. Жанкент ауылының жас спортшылары бүгінде Ермұхаммедке қарап бой түзейді.
Жас балуанның алдағы мақсаты – халықаралық аренада ел намысын қорғау. Жергілікті бапкерлер мен ауылдастары оның болашағынан үлкен үміт күтеді. Оның «Ең бастысы – тоқтамау. Күн сайын өзіңді жеңуге тырыссаң, жеңіс те сені табады» деген ұстанымы оның өмірлік қағидасына айналғандай. Ерен еңбегі мен ерік-жігерінің арқасында ол әлі талай биікті бағындырып, Қазақстан спортын жаңа белеске көтереді деген сенім зор.
Әлима НҰРАДИН,
№104 орта мектептің кітапханашысы
