Әлем тұғырынан – туған жер төріне

– Мемлекет басшысы Қасым-Жомарт Тоқаев Айдос Сұлтанғалиұлын ең алғашқылардың бірі болып құттықтап, «Ол – грек-рим күресінен осы ғасырдағы тұңғыш жеңімпаз. Балуандарымыздың жеңісті жолды жалғастыра беруіне тілектеспін!» деп ыстық ықыласын білдірді. Ал облыс әкімі Нұрлыбек Нәлібаев чемпионды арнайы қабылдап, спортшыға автокөлік, бапкеріне пәтер кілтін табыстады. Біз де бүгін қазалылықтар атынан сол құрметті жалғастырып отырмыз. Бұл жеңіс – тек Айдостың емес, барша Сыр елі мен қазақ халқының мерейі, – деді Алмасбек Әбілқасымұлы.

Аудан әкімі чемпион Айдос Сұлтанғалиға 1 000 000 теңге, бапкері Ғабиден Райымбекке 400 000 теңгенің арнайы қаржылай сертификатын табыстап, аудан жұртшылығы атынан шын жүректен құттықтады.

Шара барысында Қазақстан халқы Ассамблеясы жанындағы аудандық ақсақалдар кеңесінің төрағасы, «Құрмет» орденінің иегері Қасқырбай Әлімбай, ардагер спортшы Қуанған Бәкен және чемпионның туысы Ашықбай Тоғымов ақсақал сөз алып, жеңіс қуанышын бөлісіп, ізгі лебіздерін жеткізді.

Өз кезегінде әлем чемпионы Айдос Сұлтанғали мен бапкері Ғабиден Райымбек туған жердің көрсеткен құрметіне ризашылықтарын білдіріп, қолдаудың алдағы жетістіктерге шабыт беретінін атап өтті.

Кездесу соңында аудандық ардагерлер кеңесінің төрағасы Оразғали Бекпанов чемпионға ақ батасын беріп, жаңа биіктерден көріне беруіне тілек білдірді.

Айта кетейік, бүгінде Қазалы ауданында спорт саласын дамыту бағытында ауқымды жұмыстар атқарылып келеді. Соңғы үш жылда 3 жаңа спорт кешені мен бірнеше спорт алаңы пайдалануға берілді. Биылдың өзінде тағы 3 нысанның құрылысы аяқталып, ел игілігіне табысталмақ. Бұл – аудан жастарының салауатты өмір салтына бет бұрып, ел намысын қорғайтын жаңа чемпиондардың шығуына зор серпін берері сөзсіз.