Қар, жаңбыр, аяз: 10 қазанда ауа райы қандай болады
Жұма күні ауа райы елдің басым бөлігінде жауын-шашынсыз болады. 
Фото: pixabay.com
Фото: pixabay.comCиноптиктер 10 қазанда ауа райы қандай болатыны туралы болжамды жариялады, деп жазады inbusiness.kz сайты.
Кейбір өңірде аяз бен жауын-шашын болуы мүмкін. Синоптиктер кейбір аймақтарда аяз болады деп күтіп отыр.
Мәселен, Жетісу облысында – -1…-6°С дейін, Алматы облысының солтүстігі мен оңтүстігінде – -1…-3°С, Жамбыл облысының батысы, солтүстігі және таулы аудандарында – -1…-3°С дейін суытады.
"Қазақстан аумағында жоғары қысым өрісінің әсерінен негізінен жауын-шашынсыз ауа райы болжанады. Тек батыс пен солтүстікте атмосфералық фронттардың өтуіне байланысты жаңбыр мен қар түрінде жауын-шашын түседі. Елдің солтүстігінде, оңтүстігінде және батысында жел күшейеді, ал батысы мен оңтүстігінде шаңды дауыл соғады. Орталық және оңтүстік-шығыс өңірлерде тұман күтіледі", – делінген болжамда.
Сонымен қатар еліміздің бірқатар аймақтарында өрт қаупі жоғары және аса жоғары өрт қаупі сақталады.
Маңғыстау облысында, сондай-ақ Батыс Қазақстан, Атырау, Ақтөбе, Жамбыл, Қостанай, Ақмола, Ұлытау және Абай облыстарының кей өңірлерінде жоғары өрт қаупі сақталды.
Аса жоғары өрт қаупі – Қызылорда, Түркістан, Атырау, Жамбыл, Батыс Қазақстан, Ақтөбе, Алматы, Ұлытау және Қостанай облыстарының жекелеген аймақтарында сақталады.
