Хирург артық салмақтан арылудың ең тиімді тәсілін атады
Фото: ©Pixabay.comСалмақ тастау адамның қанша тамақ жейтініне немесе жаттығуға қанша уақыт бөлетініне аса байланысты емес. Мұндай пікірді Лондон университеттік колледжі ауруханасының бариатриялық хирургия бойынша кеңесшісі Эндрю Дженкинсон айтты, деп хабарлайды El.kz интернет порталы.
Оның сөзіне қарағанда, калория санап, залда сағаттап жаттығудан гөрі, лептин гормонының деңгейін реттейтін тағамдарды тұтыну әлдеқайда оңай әрі тиімді.
Дәрігердің сөзінше, семіздіктің қазіргі заманда кең таралуының басты себебі – дәмді әрі калориясы жоғары тағамдар ағзаның табиғи салмақ реттеу жолдарын бұғаттайды. Басқаша айтқанда, олар лептиннің – тою гормонының жұмысына әсер етеді. Ал дәл осы гормон дене салмағын бақылап отырады.
Лептин май жасушаларынан түзіледі. Адам толған сайын, лептиннің бөлінуі де артады. Негізінде, бұл тәбетті азайтып, зат алмасуды жеделдетуі керек. Бірақ кейбір өнімдер лептин сигналын бұғаттайды. Олардың қатарында:
қант,
тазартылған көмірсулар,
өңделген тағамдар бар.
Бұл өнімдер инсулин деңгейін көтереді, ал инсулин лептиннің әсерін тежейді.
Соның салдарынан ағза лептинді «естімей» қалады: артық салмақ болса да, ми оны байқамай, әлі де салмақ жетіспей тұрғандай тәбетті арттыра береді.
Не істеу керек?
Дәрігердің айтуынша, әртүрлі тағамдардың ағзаға әсерін түсіну арқылы арықтауға болады. Ол мына кеңестерге назар аударуды ұсынды:
қантты, тазартылған көмірсуларды және өсімдік майларын барынша азайту,
олардың орнына үйде дайындалған табиғи тағамдарды тұтыну,
зиянды тіскебасарлардың орнына кешкісін аздап тұздалған көкөністерді жеу.
Маманның айтуынша, артық салмақпен күрескісі келетін адам күнделікті зиянды әдеттерді анықтап, оларды пайдалы дағдыларға ауыстыруға ұмтылуы қажет. Осылайша, артық күш жұмсамай-ақ, салмақтан арылуға болады.
