Еңбегімен елге сыйлы аналар

Жақында аудандық Әйелдер істері және отбасылық-демографиялық саясат жөніндегі комиссиясының жұмыс жоспарына сәйкес Руханият орталығында еңбекші аналармен кездесу өтті. Жұмысшы мамандықтар жылы аясында еңбек адамдарының, оның ішінде еңбекші аналардың қоғамдағы мәртебесін көтеру, олардың еңбегін дәріптеу мақсатында өткен кездесуді Қоғамдық даму бөлімінің басшысы Жәнібек Алмасұлы жүргізді.

Жиынға ауданның құрметті азаматы Бибісара Әбиқызы, аудандық мәслихат депутаттары Эльмира Жалпақбайқызы мен аудандық аналар кеңесінің төрайымы Шәкизада Келімбетқызы, ауылдық округтердегі әйелдер кеңесінің төрайымдары мен мүшелері, Отбасын қолдау орталығының мамандары, сондай-ақ әр салада еңбек етіп жүрген еңбекші аналар қатысты.

– Жұмысшы мамандықтары – кез келген мемлекеттің экономикасы мен әлеуметтік дамуының алтын қазығы. Бүгінгі кездесудің мақсаты – әр саладағы еңбекші аналардың кәсіпқойлығын, олардың қоғамдағы жауапкершілігі мен еңбегін дәріптеу. Жастарға тәрбие берудің басты құралы – еңбекке құрмет десек, бүгінгі жүздесу – осы құндылықты дәріптеудің бір парасы, – деді кездесуде Жәнібек Алмасұлы.

Шарада қарапайым еңбектің қадірін ұғындырып, маңдай терімен ел игілігіне үлес қосып жүрген бірқатар еңбекші аналар аудан әкімінің алғыс хатымен марапатталып, естелік сыйлықтар табысталды. Аудан өнерпаздары аналарға арнап ән мен жырдан шашу шашты. Жиында сөз сөйлеген Қазалы ауданының Құрметті азаматы Әбиқызы Бибісара жастарды еңбекқорлыққа шақырды.

– Жастар, құрметті аналар! Еңбек бәрін жеңбек, шынайы бақыт – адал жұмыс пен маңдай тердің жемісінде. Ел мүддесі үшін аянбай еңбек ету – әрбіріміздің қасиетті парызымыз, – деді ол.

Одан соң аудандық аналар кеңесінің төрайымы, аудандық мәслихат депутаты Шәкизада Келімбетқызы марапат алған еңбекші аналарды құттықтап, ел ішіндегі береке мен бірліктің бастауы аналар екенін жеткізді. Сондай-ақ, еңбекші ана Гүлсара Жұматқызы ұйымдастырушыларға алғыс айтып, еңбегінің елеп-ескерілгеніне ризашылығын білдірді.

Жиын соңы аудандық аналар кеңесінің мүшесі, талантты әнші Гүлнұр Аралбайқызының орындауындағы «Анаңды сүйсең менше сүй» әнімен түйінделіп, естелік суретке түсумен қорытындыланды.

Кездесуде марапатталған еңбекші аналар нағыз құрметке лайық жандар. Мәселен, Гүлсара Жұматқызы – ата-бабасында етікшілік кәсіппен айналысқан ешкім болмаса да екі қолға бір күрек деп аяқ киім тігу кәсібін игерген жанның бірі. Ұзақ жылдар Қазалы аудандық Тұрмыстық қажетін өтеу комбинатында аяқ киім жөндеу бөлімінде жұмысшы, кейін тапсырыс қабылдаушы болып еңбек еткен. Бүгінде ұл-қыздарынан көрген 8 немеренің ардақты әжесі көңілі қалаған мамандығынан қол үзбей, ширек ғасырға жуық аяқ киім жөндеп, халыққа қалтқысыз қызмет көрсетіп келеді.

Теміржол темірдей тәртіпті талап ететін сала. Мұнда жұмыс істеуге нәзікжандылардың жүрегі дауалай бермейді. Оның ішінде краншы болып жұмыс істеу қиынның қиыны. Өмірінің 35 жылдан астам уақытын теміржол саласына арнап, кран тізгіндеп келе жатқан жан – Мирамкүл Жұмабекова. Ол «LCI-MK» Қазалы филиалында кран жүргізуші болып талмай еңбек етіп жүр. Ер азаматтармен иық тіресіп, қажырлы еңбек етіп жүрген 3 перзенттің анасы кейінгі буынға үлгі.

Теміржол саласындағы еңбекқор аналардың бірі – Ақмарал Абдраманова. Ол «LCI-MK» Қазалы филиалында арматуршы болып, табан аудармастан еңбек етіп келе жатқанына биыл тура 35 жыл болыпты. Ерлермен қатар ауыр жұмысқа мойымаған Ақмарал жұбайымен бірге 2 ұл, бір қыз тәрбиелеп, олардан 4 немере сүйіп отыр.

Қоғам мен мекеменің қауіпсіздігі үшін тер төгіп жүрген аналар арасында вахтершылар да бар. Солардың бірі – Гүлнар Бұхарбаева. Ол аудандық мәдениет үйінде 15 жылға жуық вахтершы болып еңбек етіп келеді. Қай кезде де адамды адам ететін адал еңбектің құндылығы жоғалмайды. «Күміс алқалы» ана ұжымда сыйлы, үлкен-кішіге құрметті. Болмысынан жоғары адамгершілігі, қамқорлығымен танылып, адал еңбегімен абыройға бөленген жан.

Құрылыста жұмыс жасау – бейнетке бір табан жақын болумен пара-пар. Оның ішінде әйел адам жасай бермейтін ауыр кәсіп – сылақшылық. Тұрақты жұмысы болса да бойға біткен талантымен ауыр еңбектен қашпаған көпбалалы ана – Майра Зейнуллақызы еңбегімен танылған нағыз құрыш қолды құрылысшы. Ауыл үйлерінің ішкі-сыртқы сылағын сылауға тапсырыс алып, қолға алған ісін ойдағыдай бітіргенше тынбайды. Онымен қоймай, бойында еңбекке деген ынта-ықыласымен сегіз қырлы бір сырлы атанған. 5 ұл-қыздың бақыты анасы, 13 немеренің сүйікті әжесі ауылдың мәдениет үйінде тазалықшы бола жүріп, қолы қалт еткенде тігіншілік кәсібімен де көптің көңілінен шығып жүр.

35 жылдан астам уақыт ірі қара өсірумен айналысқан Аққағаз Алдабергенқызы – нағыз еңбекші ана. Бүгінде отбасылық «Заманбек» шаруа қожалығын құрып, халықты төрт түліктен өндірген ет-сүт өнімдерімен қамтамасыз етіп келеді. Шаңырақтың ұйтқысы жұбайымен бірге 4 ұл-қыз тәрбиелеп-өсіріп, 5 немере сүйген жан.

Қала ажарын әдемі ғимараттар мен көрікті гүлзарлар ғана ашпайды. Көшелердің таза болуы да маңызды.Таң атқаннан күн батқанға дейін көше тазалығын сақтауда тынбай жұмыс жасап жүрген нәзік жанды аналардың еңбегі құрметке лайық. Солардың бірі Айнұр Жұмағали. Ол «Күміс алқа» иегері. 10 жылдан астам уақыт қоғамдық негізде жұмыс жасап, қоршаған ортаның тазалығына үлес қосып келеді.

Бала тәрбиесі мен тұрмыстың тіршілігін ұршықтай иіріп отырған алтын құрсақты ана Жанат Амалбекқызы. Тігінші. Бала кезінен тігіншілікке қызығып, қыр-сырын үйренген. Сол хоббиі қазір негізгі жұмысына айналып, осы салада жұмыс істеп жүргеніне 15 жылға жуықтаған. 2023 жылы мемлекеттік грант арқылы үкіметтен қайтарымсыз қаржы алып, өз ісін дөңгелетуде. Тігін шебері әр тапсырысын ерекше ынтасымен орындап, көптің алғысын арқалап жүр.

Коммуналдық мекемеде таң атқаннан кеш батқанға дейін бел жазбай еңбек ететін қарапайым жұмысшы-аналар – нағыз еңбек адамдары. Олар қала ұйықтап жатқанда еңбекке кіріседі. Сондай жандардың бірі – Жұлдыз Оразбаева. Ол 5 жылдан астам уақыт бейнетімен адал нанын тауып, ғимараттар мен көшелердің тазалығын қадағалап, аудан тұрғындарының мұнтаздай жарқыраған жерде жүруіне, жұмыс жасауына жағдай жасап жүр. Жұлдыз 3 баланың аяулы анасы, бақытты отбасының ұйытқысы.

Көпшіліктің талғамы мен талабына сай ас әзірлейтін еңбекқор қыздардың бірі – Айым Бегалиева. Ол Атырау қаласындағы мұнай компаниясында аспаз болып жұмыс жасағанына 10 жылға жуықтаған. Бүгінде өз кәсібін шебер меңгерген аспаз компания жұмысшыларының көңілінен шығып, алғысын арқалап жүр.

Иә, дана халқымыз «Әйел бір қолымен бесікті тербетсе, бір қолымен әлемді тербейді» дейді. Қазақ әйелі – мәңгіліктің, елдіктің, биіктіктің өлшемі. Өңірдің дамуында әйелдердің үлес салмағы басым. Сол үшін аймағымызда әйел-аналарға ерекше құрмет жасалып, оларға қолдау көрсетіліп келеді.