Білікті краншы Болатбек

Автокраншы – үлкен салмақты жүктерді көтеруге, жылжытуға және белгіленген жерге орнатуға арналған арнайы машинаны, яғни автокрандар басқаратын маман. Оның жұмысы құрылыс, өндіріс және басқа да салаларда өте маңызды.

Болатбек Жандосов өндірістік және құрылыс салаларындағы қозғаушы күш болып табылады. Өз ісінің майталманы «Намыс Құрылыс» жауапкершілігі шектеулі серіктестігінде тер төккеніне тура 31 жыл болды. Негізгі еңбек өтілі қырық жылға жуықтайды. Іскер жұмысшы ең алғаш еңбек жолын «СМП-716» мекемесінен бастаған. Кейін Кеңес Одағы ыдыраған кезде аталған жұмыс орны таратылып, орнына «Намыс Құрылыс» ЖШС құрылды.

Болатбек Сәдуақасұлы өмірлік мамандығын әскери борышын өтеген кезде меңгеріп шыққан. Оған дейін Қазалыдағы училищеде тракторшы механизатор ісіне машықтанды. Қазір өте жауапты және нақты әрекеттермен жұмыс істейді.

– Автокранды басқару ең басты міндетім. Кез келген автокраншы кранның барлық механизмдерін басқаруды білуі керек. Ол жүкті қауіпсіз көтеріп, жылжытып, төмен түсіруі тиіс.

Қандай да бір жұмысты бастамас бұрын жұмыс істейтін алаңның қауіпсіздігін тексерген абзал. Кранның орнықты тұруы үшін тіректерді дұрыс орнатып, топырақтың беріктігін тексеруі қажет. Көтеретін жүктің салмағын, өлшемін және оның қауіпсіз байлау тәсілдерін білген жөн. Кейде бұл жұмысты жүк байлаушы орындаса да, краншы оның әрекеттерін қадағалап отырғаны дұрыс. Сонымен қатар краншының жұмысындағы ең маңызды аспект – қауіпсіздік ережелерін сақтау. Ол кранның жүк көтеру қабілетін ескеріп, электр желілеріне, ғимараттарға және басқа да кедергілерге соғылып қалмауын қадағалайды.

Сондай-ақ ауа райының қолайсыз жағдайларында (қатты жел, найзағай) жұмысты тоқтату туралы шешім қабылдайды, – дейді Болатбек Жандосов.

Білікті маман кранды техникалық қызмет көрсетуіне үлкен мән береді. Әркез кранның дұрыс жұмыс істеуі үшін оны күнделікті тексеріп, майлау жұмыстарын жүргізеді. Ақаулықтарды дер кезінде анықтап, оларды жою үшін тиісті мамандарға хабарлайды.

Болатбек Сәдуақасұлының айтуынша, ол жүк тасу операцияларын жоспарлап қояды. Яғни күрделі тапсырмалар кезінде, краншы жүкті көтеру мен жылжытудың ең тиімді және қауіпсіз әдісін алдын ала жоспарлайды.

Бүгінгі күні алтынқолды мамандар әртүрлі салада сұранысқа ие. Құрылыста ғимараттардың іргетасын қалаудан бастап, шатырын жабуға дейін барлық кезеңдерде құрылыс материалдарын плиталар, темір-бетон конструкциялар, кірпіш паллеттерін көтереді. Жол құрылысында көпірлер мен жол өтпелерін салуда ауыр конструкцияларды орнатуға көмектеседі. Мұнай-газ өнеркәсібінде бұрғылау қондырғыларын орнатуға, құбырларды жылжытуға және басқа да ауыр жабдықтармен жұмыс істеуге қатысады.

Өндіріс және логистикада зауыттардағы үлкен станоктарды немесе қоймалардағы ауыр жүктерді орнынан жылжытуға қолданылады.

Автокраншының жұмысы ерекше білім мен дағдыны, сондай-ақ үлкен жауапкершілікті талап етеді. Бұл – тек техниканы басқару емес, сонымен қатар қауіпсіздікті қамтамасыз ететін маңызды мамандық.