Ерлі-зайыпты Сыдық пен Кенжебике Оспановтар аталған мекемеде ұзақ жылдар жұмыс істеп су шаруашылығы саласының өркен­деуіне айтарлықтай үлес қосты. Отағасы мұраб болса, отанасы су реттеуші болды. Жас күнінен ата-анасының жұмысына қанық ұлдары Ерсайын Оспанов та болашағын су шаруашылығы саласымен байланыстырды. Аталған мекемеде гидротехник, бас инженер қызметтерін абыроймен атқарды. Оның жары Тойдық Оспанова су реттеуші болып жиырма бес жылға жуық еңбек етті. Ата жолын ардақ тұтып, әке ізін жалғаған қос ұл Жанбай мен Жарқынбек Ерсайынұлы қазіргі таңда осы өндірістік учаскеде жұмыс істейді. Жарқынбектің келіншегі Анар Ермаханова – су реттеуші.

Алғаш еңбек жолын су реттеуші болып бастаған Жанбай Ерсайынұлы 1994-1997 жылдары еңбектен қол үзбей жүріп, Қызылорда политехникумыннан гидротехник мамандығын мең­герді. Әр жылдары гидротехник, аға инженер, Оң жаға бөлімшесінің басшысы қызметтерін атқарды. Су шаруашылығы саласында айтар­лықтай тәжірибе жинақ­таған ол 2016 жылдан бас­тап құрылыс жөндеу бөлімінің бастығы. Жарқынбек болса, Оң жаға бөлімінде жетекші маман. Ағайынды Садықовтардың жұмысқа деген жауапкершілігі мен тапсырылған іске тиянақтылығы туралы әріптестері жиі айтады.

– Біз үшін су шаруашылығы саласында жұмыс істеу отбасылық дәстүрдің бірі секілді. Мен де мамандық таңдауда көп ойланбадым. Отбасы мүшелерінің бір салада еңбек етуінің тиімді тұстары көп. Әкемнен естіп-білгенімді көкейге түйіп өстім. Оның ақыл-кеңестері осы салада шыңдалуыма үлкен әсер етті, – дейді Жанбай Ерсайынұлы.