Дәурен – үздік инспектор
Халықтың тыныштығы мен қоғамдық тәртіпті қадағалаудағы бас¬ты күш – құқық қорғау органдарында. Соның ішінде ішкі істер бөлімінің қырағы сақшыларының еңбегі елімізде жоғары бағаланады. Қызығы мен қиындығы қатар жүретін бұл салада шыңдалып, қоғамның әрбір мүшесі үшін өмірдің қаншалықты маңызға ие екенін жақсы білеміз.Ел тыныштығы, тұрғындар қауіп¬сіздігі, қылмыскерлерді құрықтау, заңсыздықты анықтау – тәртіп сақшыларының мойнында. Ауданда қылмысты азайтып, түрлі келеңсіз оқиғалардын алдын-алуға, тәртіп бұзушылықты тізгіндеуде учаскелік полицияның еңбегі көп. Жақында Қазалы ауданы полиция бөлімінің үздік учаскелік полиция инспекторы анықталды.
Қоғамның қауіпсіздігі мен тұрғындар тыныштығын қамтамасыз ету мақсатында, жұртшылықпен тығыз қарым-қатынаста қызмет ететін учаскелік полиция инспекторларына жүктелген жауапкершілік мол. Үнемі қылмыстың алдын алу мен құқық бұзушылықтардың жолын кесу бағытындағы қызметті қалтқысыз орындап, тұрғындармен кері байланысты сапалы жүргізуге міндетті. Осы қызметін қырағылықпен атқарып жүрген өңірдің үздік учаскелік полиция инспекторлары өзара сайысқа түсіп, кәсіби қабілеттерін көрсетіп бақ сынасты.
Полиция қызметкері – қоғамдық тәртіптің басты сақшысы. Сол сала маманы болуы үшін – ең алдымен физикалық тұрғыдан мықты, жүйкесі берік, шапшаң әрекет ете алатын, барынша адал әрі психолог болуы тиіс. Қойылатын талаптардың да үдесінен шығу – оңай болмасы анық.
Осындай қажыр-қайратты қажет ететін мамандыққа өмірін арнап жүрген жанның бірі үздік болып анықталды. Қазалы ауданының полиция бөлімі аумағы бойынша жауапты учаскелік полиция инспекторы, полиция капитаны Дәурен Кұрмарзаев ауданның үздік учаскелік полиция инспекторы болып анықталып, Қызылорда облысының Полиция департаментінде өтетін байқауға жолдама алды.
А. АЙДАРҚЫЗЫ
