«Аптап ыстық, нөсер жаңбыр»: Бүгін ел аумағында күн құбылмалы болады
Бұған атмосфералық фронтальды бөліктердің жылжуы түрткі болады.
Фото: pexels.com
Фото: pexels.com2025 жылғы 14 шілдеде Қазақстан аумағында тұрақсыз ауа райы күтіледі, деп хабарлайды Skifnews.kz ақпарат порталы.
Синоптикалық жағдай мен қауіпті құбылыстардың болжамына сәйкес, республикамыздың батысында, солтүстік-батысында, солтүстігінде, шығысында және оңтүстік-шығысындағы таулы аудандарда найзағай ойнап, жаңбыр жауады. Бұған атмосфералық фронтальды бөліктердің жылжуы түрткі болады.
"Еліміздің солтүстік-батысында, солтүстігінде және шығысында бұршақ жаууы мүмкін. Шығыста нөсер жаңбыр жауады деп күтіледі. Еліміздің қалған аумағында антициклон әсерінен жауын-шашынсыз ауа райы сақталады", - дейді "Қазгидромет" РМК.
Қызылорда облысында шаңды дауыл тұрып, желдің екпін алады деп болжанады.
Күндіз Атырау, Жамбыл, Жетісу, Батыс Қазақстан облыстарында, сондай-ақ Алматы облысының батысында, солтүстігінде, Ақтөбе облысының оңтүстігінде және Ұлытау облысында сынап бағаны +35...+39 градусты көрсетіп, аптап ыстық болады деп күтіледі.
Түркістан облысында 14 шілдеде сынап бағаны +40 градусқа дейін, ал Маңғыстау облысында + 41 градусқа дейін көтеріледі деп болжанады.
