Үй мен мектеп – бір кемеде
Жақында Ы.Алтынсарин атындағы №204 орта мектепте оқу ордасының педагог-психологтары мен мектеп дефектологының ұйымдастыруымен ауқымды апталық өтті. Ата-ана мен мектеп арасындағы өзара ынтымақтастықтың маңыздылығын көрсету мақсатындағы «Үй мен мектеп – бір кемеде» атты шараны мектеп директоры Мейрамбек Жұмашов ашты. Мектеп басшысы өз сөзінде отбасы мен мектеп арасындағы сенімді қарым-қатынастың маңызына тоқталып, бірлікте жұмыс істеу оң нәтижелерге бастайтынын жеткізді.Маңызды тәрбие жұмысында мектептің педагог-психологтары Айна Амангелдіқызы мен Роза Әбдіқалиева, арнайы маман Толқынай Елубайқызы баланың ішкі әлеміне үңіліп, оны түсіну, қолдаудың заманауи тәсілдерімен бөлісіп, тағылымдық кеңестер берді.
Бала тәрбиесі – қос тараптың ортақ құндылығы. Мектеп білім мен тәртіпке бағыт берсе, үйде сол ұстанымның іргесі қаланады. Ұстаз бен ата-ана бұл бағытта мақсаттарын бір арнаға тоғыстыруға мүдделі. Апталық аясындағы «Empathy zone: Баршаға тең мүмкіндік» тақырыбындағы жұмыс ұсынылды.
Ата-ана ретінде мектепте өткен шараларға жиі қатысамын. Айтайын дегенім, дефектолог, арнайы маман Толқынай Елубайқызының үйден оқитын ерекше ұлыммен жасаған жұмыстары үнемі қуантып, баламның ертеңіне сенімімді арттыруыма септесіп отырады. Бұл апталықтағы түрлі жаңашыл шара, әдіс-тәсіл, тренингтер де жоғары деңгейде өтті. Қатысушалар көтеріңкі көңіл күй, жаңа ізденісті бағыттарға қанығып, алғыс айтып, тарқасты.
Бақыткүл АЙЖІГІТОВА,
Ата -ана
