Партия мүшелері «Жеңіс» саябағындағы тазалық шарасына қатысты
Бүгін аудан орталығындағы абаттандыру жұмыстары жүргізіліп жатқан «Жеңіс» саябағында «AMANAT» партиясы мүшелерінің қатысуымен тазалық жұмыстары ұйымдастырылды.Ұлы Жеңістің 80 жылдығы қарсаңында өткізілген тазалық шарасында «AMANAT» партиясы Қазалы аудандық филиалының қызметкерлері мен «Орталық», «Жанқожа, «Шымыр» және «Достық» бастауыш партия ұйымының мүшелері белсенділік танытты. Олар саябақ ішіндегі ағаш түптерін әктеп, аяқ су арықтарын тазарту жұмыстарына атсалысты.
Айта кетейік, былтыр қыркүйек айында 40 жылдық тарихы бар «Жеңіс» саябағын «Қазалы» мәдени-демалыс кешеніне айналдыру жұмыстары басталған болатын. Саябақ аумағында бірнеше аллея, отбасылық мейрамханалар, демалыс және спорт алаңдары, аквапарк пен жабық бассейн салынуда. Қазіргі таңда кейбір нысандардың құрылысы аяқталуға жақын. Кешен мамыр айында пайдалануға беріледі деп жоспарлануда.
