«ЖАЙЛЫ МЕКТЕП»: ҚАЗАЛЫДА БІЛІМ ОРДАСЫНЫҢ ҚҰРЫЛЫСЫ АЯҚТАЛУҒА ЖАҚЫН
Қазалы ауданында бүгінде Ел Президенті Қасым-Жомарт Тоқаевтың бастамасымен қолға алынған «Жайлы мектеп» ұлттық жобасы аясында Жанқожа батыр ауылында 300 орындық мектеп құрылысы қарқынды жүргізілуде. Бұл туралы Өңірлік коммуникациялар қызметінің ақпарат алаңында белгілі болды.
«2025 жылдың наурыз айында «Жайлы мектеп» ұлттық жобасы аясында Жанқожа батыр ауылында 300 орындық мектеп құрылысын толық аяқтап, пайдалануға беру жоспарымызда бар. Айта кетейік, 2024 жылдың басында Әйтеке би кентінде 250 орындық мектеп ғимараты пайдалануға берілсе 11 білім беру ұйымына талапқа сай бейнекамера орнатылды. 10 мектеп жабдықталған кабинетпен қамтамасыз етілді.
Сонымен бірге, Қ.Сәтбаев атындағы №216 орта мектеп ғимаратының қасбетін қаптауға 20 млн. теңге және Е.Бозғұлов атындағы №249 мектеп-лицей ауласына ойын алаңын салуға 26 млн. теңге қаржы бөлініп, жұмыстар жүргізілді» - деді Қазалы ауданының әкімі Мейрамбек Шермағанбет.
