Дария деңгейі тұрақты бақылауда
Аудан әкімі Мейрамбек Шермағанбет Басықара ауылындағы «Ә.Тыныбаев» атындағы Қазалы су торабына барып, Сырдария өзенінің бойындағы ахуалды бақылады.Су торабының бастығы Болат Әсербаев аудан басшысына бүгінгі күні дарияға қаншалықты су келіп тұрғандығын, судың деңгейін және мұз қалыңдығы жөнінде баяндады.
Ал аудандық төтенше жағдайлар бөлімінің бастығы Алтынбек Қалиев алдағы мұз еру кезеңінде Сырдария өзені арқылы жоғары жақтан келетін мұзды аудан аумағынан қауіпсіз өткізіп жіберу жұмыстары мен өзен бойындағы қауіпті саналатын аймақтардың барлығы үнемі бақылуда екенін жеткізді.
Қазіргі таңда аудан аумағындағы Қазалы су торабына жоғарыдан 280 м3/с су келуде. Одан бөлек, мұздың қалыңдығы 30-33 см шамасында болып тұр.
Аудан әкімі аудандық төтенше жағдайлар бөлімінің бастығына су деңгейін қатаң бақылауда ұстап, жоғары жақтан келетін мұздың кедергісіз қозғалысын және ауыл-аймақтарға қауіп төндірмеуін күндіз-түні қатаң бақылауды тапсырды.
©Қазалы ауданы әкімінің баспасөз қызметі
