Маңызды мәселелер қаралды
«Тазалық – табалдырықтан басталады», – дейді халық даналығы. Әсем қалаға айналуды көздеген Қазалының таза болуы осы мақсатқа жетуді жеделдетері сөзсіз. Бұл тұрғыда ауданның тындырып жатқан тірлігі көңіл көншітеді. Мезгіл сайын ауданда мезгіл сайын талдарды балақтау, арық-атыздарды тазалау, ағаштарға көктемгі санитарлық қызмет көрсету, қоғамдық орындардағы алаңқай, аулаларға күтім жасау сынды ілкімді жұмыстар атқарылып жүр. Жуырда аудан әкімі Мейрамбек Шермағанбеттің төрағалығымен аудандағы тазалық жұмыстарына қатысты жиын өтті.
Мәжілісте М.Зинабдинұлы «Таза Қазақстан» экологиялық бағдарламасын іске асыру жөнінде сөз қозғады. Былтыр еліміз бойынша Мемлекет басшысының бастамасымен қолға алынған «Таза Қазақстан» республикалық экологиялық бағдарламасы аясында ауқымды жұмыстардың атқарылғандығын атап өтті. Бұл жұмыстар биыл да жалғасып, қоршаған ортаны таза ұстау, туған жерімізді көгалдандыру, абаттандыру тұрғындардың күнделікті әдетіне, өмір салтына айналуы тиіс екендігін айтты.
Елімізде бұл бағыттағы жұмыстарды одан әрі жүйелі түрде жалғастыру үшін Экологиялық мәдениетті дамытудың 2029 жылға дейінгі өңірлік жоспары бекітілді. Осының негізінде барлық кент, қала және ауылдық округ әкімдеріне іс-шаралар жоспарын бекітіп, жыл көлемінде жоспарға сәйкес санитарлық тазалық, абаттандыру, көркейту-көгалдандыру жұмыстарын жүйелі түрде жүргізу жөнінде тапсырма берді.
Мұнан соң аудан басшысы IT экспортты дамыту мәселелеріне тоқталды.
– Қазіргі таңда заманауи технологиялар қарыштап дамып, барлық салалар заман талабына сай цифрлық жүйелерге ауысуда. Осыған сәйкес елімізде азаматтардың жасанды интеллектті пайдалану тетіктерін енгізуде нақты шаралар қабылдануда. Бізде осы бағыттағы жұмыстарды күшейтіп, жасанды интеллектке баса мән беруіміз керек. Әсіресе білім саласына жасанды интеллект тақырыбын қосып, жастарды оның мүмкіндіктерін пайдалануға оқыту, насихаттауға жұмыс жасауымыз керек, – деді ол.
Мәжіліс барысында күн тәртібінен бөлек басқа да өзекті мәселелер қаралап, жауапты сала басшыларына бірқатар тапсырмалар жүктелді.
С.ӘЛИҰЛЫ
