«Бүгінгі форум идеологиялық мәні зор, пайымды пікірлерге толы қоғамдық көшбасшылардың ортақ алаңына айналады деп санаймын.

Кездесуге келген сіздердің тәжірибелеріңіз, ойларыңыз, ұсыныстарыңыз алдағы жоспарларымызды нақтылап, ортақ мақсатымызға жетуге септігін тигізеді. Президентіміз Қасым-Жомарт Кемелұлы республикалық «Ана тілі» газетіне берген сұқбатында «Жастарымыз халқымыздың болмысына жат идеялардың жетегінде кетпесе, күйзеліске түспесе, нигилизмге бой алдырмаса екен деп тілеймін. Олардың белсенді, тәртіпті, білімпаз, еңбекқор болғанын қалаймын» деп, жастар арасындағы зиянды әдеттерге айрықша тоқталып өтті.

Бүгінде жасөспірімдер арасындағы құқық бұзушылықтың алдын алу - қоғам алдындағы басты міндеттердің бірі. Әсіресе, олардың құқықтық сауаттылығын арттыру, заңсыз іс-әрекеттер жасаудан қорғау, заңға бағынушы азамат ретінде құқықтық тәлім– тәрбие беру - заман талабы. Елімізде құқық қорғау органдарының тиімді жұмысының нәтижесінде соңғы 5 жылда құқық бұзушылық саны

32 пайызға азайды. Облысымызда да едәуір, яғни 49,7 пайызға төмендеген. Бұл - әлі де азайтуды қажет ететін маңызды көрсеткіш!

Сол себепті, біз аймақта тұрақтылықты сақтау және құқық бұзушылықты болдырмау бағытында барлық деңгейдегі құқық қорғау органдары басшыларымен бірге алқалы жиындар, түрлі кездесулер, ашық қабылдаулар өткізіп келеміз. Бұл өз кезегінде азаматтардың құқық қорғау органдарымен сенімді әрі сындарлы диалог орнатуына жол ашты. Халқымызда «Тәрбиелі адам – тағалы атпен тең» деген жақсы сөз бар. Тәртіп бар жерде өркениетті қоғам қалыптасатынын бүгінгі ұрпаққа жеткізу – біздің басты міндетіміз. Саналы ұрпақ тәрбиелеу – мәртебесі биік, маңызы зор ұлттық міндет. Әділетті Қазақстан құру жолындағы ізгі мақсат-мұратымызға бекем бірлікпен, тату тірлікпен, толайым жетістікпен жете берейік! Елдігіміз еңселі, Тәуелсіздігіміз тұғырлы болғай! Форум жұмысына сәттілік тілеймін!», -деді аймақ басшысы.

Жиында Парламент Сенатының депутаты Наурызбай Сейтқалиұлы, Мәжіліс депутаты Мұрат Абдуламитұлы, облыс прокуроры Ризабек Кәрімұлы, Нұрлан имам Байжігітұлы, Олимпиада чемпионы Ермахан Ибраимов, актер режиссер Рүстем Омаров сөз сөйледі.

Сонымен қатар, іс-шарада «Нашақорлыққа жол жоқ» бір айлық акциясының нәтижесімен белсенді қатысушылар марапатталды.

Айта кетейік, аймақта балалардың жарқын болашағына бағытталған ауқымды жобалар бар. Өткен жылы «ҚазГермұнай» компаниясының демеушілігімен Қызылорда қаласында заманауи үлгідегі 350 орындық "Оқушылар сарайы" пайдалануға берілді. «Білімді қолдау қоры» есебінен физика-математика мектеп-интернаты, балалар мен жасөспірімдердің шығармашылығын шыңдау мақсатында «Шығармашылық академиясы» салынуда. Дарындар тоғысатын жаңа ғимарат мамыр айында ел игілігіне табысталады. «Саутс Ойл» компаниясының демеушілігімен музыкалық колледждің жаңа ғимараты бой көтеруде.

Ел Президентінің бастамасымен іске асқан «Жайлы мектеп» ұлттық жобасы аясында 3 мектеп пайдалануға беріліп, балалар лайықты білім алуда. Жаңақорған ауданының орталығынан "Оқушылар үйі" мен "Өнер мектебі", «Самұрық Қазына Траст» әлеуметтік жобаларды қолдау қорымен бірлесіп, «Үстел теннисі» орталығы іске қосылды.

Барлық ауданда ішінде неке қию залы, кітапхана, музей, архив, жастар сарайы, ардагерлер мен аналар үйі бар «Руханият» орталықтары салынуда. Қармақшы және Шиелі аудандарындағы осындай орталықтар ашылды, жақын арада қалған аудандарда да пайдалануға берілмек.