Иә, жаңа жыл мерекесі қарсаңында сауда орындарында, базарларда көптеген пиротехникалық бұйымдар сатылады. Бұл бұйымдарды көпшілік аудан көлеміндегі барлық мектеп, балабақша, мәдениет үйлерінде, тойханаларда шыршалық кеште пайдаланса, күнделікті көшеде де балалар еркін қолданып жүр. Сапасыз өнімнің адам өміріне қаншалықты қауіпьі екенін білесіз бе?

Алдымен бұл – «китайский». Екіншіден материалдық шығынға әкеп соқтыруы әбден мүмкін. Пиротехникалық бұйымдарды мерекелік іс-шаралар өткізіліп жатқан жерде, аула ішінде, бөлмелерде пайдалануға қатаң тиым салынатынын ескеріп жатпайтындар баршылық. Соның салдарынан зардап шегушілер саны жылдан жылға ұлғаюда. Оның ішінде мектеп оқушыларының «бенгаль оттарын» жағуынан қол күйігі және саусақ жарақаттары орын алады. Сонымен қатар «салют фейрвергтері» әсерінен тұрғын уйлер ауласындағы отын қоймалары және шөп сарайлары өртенуі әбден мүмкін. Қауіпсіздікті сақтау өз қолыңызда.

Ал мамандар мұның барлығын ескертіп, алдын алу шараларын жүргізуде. Облыс аумағында «Пиротехника» іс-шарасы басталды. ҚР ІІМ-нің нұсқаулығына сәйкес 2024 жылдың 5-желтоқсанынан бастап 2025 жылдың 3-қаңтар аралығында 2 кезеңнен тұратын республика аумағында «Пиротехника» жедел профилактикалық іс-шарасы өткізілуде. Басты мақсаты – заңды және жеке тұлғалардың пиротехникалық өнімдерді сақтау, сатып алу, тасымалдау тәртібінің сақталуын тексеру, сертификатталмаған өнімді жеткізушілерді анықтау, осы өнімдердің салдарынан болатын төтенше жағдайлардың алдын алу. Аталған іс-шараға байланысты облыс көлеміндегі базарлар мен сауда орындарында рейдтік іс-шаралар ұйымдастырылуда. Мереке қарсаңында балалар арасында жарақатты болдырмау мақсатында барлық білім беру мекемелерінде мектеп инспекторларымен қауіпсіздік шаралары туралы дәрістер де өткізілмек. Елді мекендерде және бұл үшін бөлінбеген орындарда арнайы не қолдан жасалған пиротехникалық құрылғыларды жару орын алған жағдайда пиротехникалық құралдар мен құрылғылар тәркілене отырып, ҚР ӘҚБтК-нің 436-бабының 2-бөлігіне сәйкес 20 айлық есептік көрсеткіш көлемінде айыппұл салынады.

Мұндай шара Қазалы ауданында да жүзеге асуда. ҚР ІІМ Көліктегі полиция департаментінен келіп түскен нұсқауға сәйкес Қазалы станциясы ЖПб-нің қызмет атқару аймағында, теміржол объектілерінде, құқық бұзушылықтар мен қылмыстың алдын алу, жолын кесу және қоғамдық тәртіпті сақтау, қауіпсіздікті қамтамасыз ету мақсатында 2024 жылдың желтоқсан айының 5-12 жұлдызы аралығында «Пиротехника» жедел-профилактикалық іс-шарасының 1-кезеңі жүргізілуде. Айта кеткен жөн, пиротехникалық заттардың және оларды қолданып жасалған бұйымдардың айналымы саласындағы қызмет құқығына лицензиясы бар тұлғалардың пиротехникалық заттарды сақтау, олармен сауда жасау тәртібін бұзған тұлғаларға өз заңы бар. ҚР ӘҚБтК-нің 483-бабы 1-бөлігі бойынша пиротехникалық құралдары тәркілене отырып, жеке тұлғаларға – 5, шағын кәсіпкерлік субьектілеріне немесе коммерциялық емес ұйымдарға – 10, орта кәсіпкерлік субьектілеріне – 15, ірі кәсіпкерлік субьектілеріне – 45 айлық есептік көрсеткіш мөлшерінде айыппұл салынады екен. Еркін сауда жасауға Қазақстан Республикасының заңнамасымен тыйым салынған немесе шектелген тауарлармен, заттармен сауда жасау ҚР ӘҚБтК-нің 196-бабына сәйкес 25 айлық есептік көрсеткіш мөлшерінде айыппұл салуға әкеліп соғатынын ескертеді олар.