iPhone 18 Қазақстанда қанша тұрады: жаңа модельдердің бағасы жарияланды
Қазақстанда Apple компаниясының жаңа смартфондары – iPhone 18 Pro және iPhone 18 Pro Max модельдерінің бағасы белгілі болды. Құрылғыларға алдын ала тапсырыс 18 қыркүйекте басталған. Қазақстандағы Apple компаниясының ресми серіктестері жаңа смартфондардың құнын жариялады.
Жаңа iPhone-ның бағасы ең алдымен оның жады көлеміне байланысты. iPhone 18 Pro-ның 256 GB нұсқасы 849 990 теңгеден басталады.
Модельдің 512 GB нұсқасы – 993 990 теңге, 1 TB – 1 275 990 теңге, ал ең жоғары 2 TB нұсқасы 1 698 990 теңге тұрады.
Ал iPhone 18 Pro Max үшін қазақстандық сатып алушылар көбірек қаржы төлеуі керек. Оның 256 GB нұсқасы 909 990 теңге болса, 512 GB – 1 063 990 теңге, 1 TB – 1 345 990 теңге. Ең үлкен жады бар 2 TB моделі 1 769 990 теңгеге бағаланған.
Осылайша, ұсынылған модельдердің ең арзан және ең қымбат нұсқаларының арасындағы айырмашылық 920 мың теңгеге жетеді.
Смартфондар қашан сатылымға шығады?
iPhone 18 Pro және iPhone 18 Pro Max модельдеріне алдын ала тапсырыс 18 қыркүйекте сағат 00:01-де қабылдана бастады. Ал құрылғылардың ресми сатылымы 25 қыркүйекте басталуы жоспарланған.
Смартфондар өндірушінің ресми кепілдігімен сатылады. Сонымен қатар құрылғылардың IMEI-коды міндетті түрде верификациядан өтеді.
Apple компаниясының iPhone Duo деп аталатын моделі Қазақстан нарығына кейінірек шығарылады. Оның нақты сатылым күні әзірге белгісіз.
iPhone 18 Pro-дағы өзгеріс
Apple жаңа iPhone 18 Pro және iPhone 18 Pro Max модельдерін 9 қыркүйекте таныстырды. Жаңа смартфондардың негізгі камерасы 48 Мп сенсормен жабдықталған және ауыспалы диафрагма жүйесін алған.
Сонымен қатар құрылғыларда жаңа A20 Pro процессоры мен жаңартылған салқындату жүйесі қолданылған. Siri да жасанды интеллект мүмкіндіктерімен толықтырылған.
Экран өлшемдері бұрынғыдай қалды: iPhone 18 Pro – 6,3 дюйм, ал Pro Max – 6,9 дюйм. Тағы бір жаңалық – 2 TB жады нұсқасының пайда болуы. Бұған дейін Pro сериясындағы смартфондарда мұндай үлкен ішкі жад ұсынылмаған.
АҚШ-тағы бағасы қанша?
АҚШ нарығында iPhone 18 Pro-ның бастапқы бағасы 1199 доллар, ал iPhone 18 Pro Max 1299 доллар болды. Презентация кезінде бұл шамамен 544 мың және 590 мың теңгеге тең еді.
Қазақстандағы бағаның айырмашылығына салықтар, логистика, нарықтағы баға саясаты және құрылғының ресми түрде сатылуы сияқты факторлар әсер етеді.
