Инженерлік инфрақұрылым – елдің экономикалық және әлеуметтік өмірінің негізі. Ол көлік, энергетика, су және жылумен қамтамасыз ету жүйелерінен тұрады. Есіңізде болса, Ұлттық құрылтай отырысында Мемлекет басшысы Қасым-Жомарт Тоқаев Үкімет алдына ауқымды міндеттер қойған еді. Соның ішінде ірі инфрақұрылымдық бастамалар айтылды. Президент айтқан салалар – тұрғын үй-коммуналдық шаруашылық нысандарын жөндеу және жаңғырту, баспана құрылысы, жолдарды жөндеу және газдандыру болатын. Жауапты министрліктер осы бағыттардың әрқайсысы бойынша тиісті жұмысты бас­тап кетті. Алда нақты көрсеткіштер бар және ол бойынша барлық мемлекеттік орган, әкімдіктер, квазимемлекеттік сектор мен бизнес компаниялар тартыла бастады. Қош. Қазалы ауданындағы инженерлік инфрақұрылым бойынша атқарылып жат­қан жұмыстардың легі қандай?

Ауданның инженерлік-инфрақұры­лы­­­­мын дамыту мәселесі басты назарда тұр. Себебі, жер кезегінде тұрған тұр­ғындардың саны жылдан жылға артып келеді. Тұрғын үй салу үшін жер кезектілігін азайту мақсатында бас жос­парға сәйкес Әйтеке би кентінің оңтүстік-батыс беткейінен көлемі 600 гектар аумаққа инженерлік инфрақұрылым жобасы әзірленген. Жалпы жоба құны – 8 921,6 миллион теңге. Қазіргі таңда тиісті комитеттерге қаржыландыруға ұсынылған. Қаржысы күтілуде.

Ал аудан халқының 97,3 пайызы орталықтандырылған ауыз сумен қамтылған. 2022 жылы 2025 жылға дейінгі орталықтандырылған сумен жабдықтау жүйесіне қосудың егжей-тегжейлі схемасы бекітілді. Орталықтандырылған су жүйесіне қосу үшін Сарбұлақ (730,7 млн теңге), Шәкен (361.7 млн теңге), Шилі (235,7 млн теңге) елді мекендерді ауызсумен қамту жобалары әзірленіп, сараптаманың оң қорытындысы алынған. Аталған жобаларда су айдау насостарын орнату, су сақтау резарвуарын, су тұщыту қондырғысын салу және сервистік су желісін тарту жұмыстары қаралған. Ажар, Жұбан, Бірлік елді мекендерін су тұщытқыш қондырғысы арқылы ауызсумен қамту үшін 2024 жылға аудандық бюджеттен 52,4 миллион теңге бөлініп, су тұщытқыш құралдары орнатылды.

Бұл жұмыстар кезең-кезеңімен іске асыру арқылы 2025 жылы ауданда ауызсу мәселесі 100 пайыз түбегейлі шешіледі деп күтілуде. Электр энергиясымен қамту бағытында да ауқымды жұмыстар атқарылуда. Мәселен, биыл жалпы құны 449,1 миллион теңге болатын 3 жоба жүзеге асырылуда. Біріншісі, Қазалы қаласының электр желілерін толық жаңарту жұмыстарын бастауға 111,4 миллион теңге. Жалпы құны 592 миллион теңге. Екіншісі, «Ауыл – ел бесігі» арнайы жобасы аясында Қожабақы ауылының электр желілерін қайта жаңғырту жұмысын бастауға 50 миллион теңге. Жобаның жалпы құны 453 миллион теңге. Үшіншісі, Әйтеке би кентінің электр желілерін қайта жаңғырту жұмыстарына 287,7 миллион теңге (2023 жыл 187,7 миллион теңге, 2024 жыл – 100 миллион теңге). Жобаның жалпы құны 319,6 миллион теңге. Нәтижесінде аудандағы электр желілерінің тозу деңгейі 70 пайыздан 62,5 пайызға төмендейді дейді мамандар.