2024 жылғы 19 тамызда ҚР Өнеркәсіп және құрылыс Министрлігі № 304 «Қара металдардың сынықтары мен қалдықтарын шығаруды реттеудің кейбір мәселелері туралы» бұйрығын қабылдады.

Бұйрыққа сәйкес ҚР аумағынан қара металдардың сынықтары мен қалдықтарын, сондай-ақ бұрын пайдалануда болған құбырларды, рельстерді, теміржол төсемінің элементтерін және жылжымалы құрамды темір жол көлігімен шығаруға уақытша тыйым салынды. Бұл норма отандық металлургиялық кәсіпорындарды шикізатпен қамтамасыз ету және тиеу мақсатында қабылданды. Өйткені ел ішінде қайталама металдарды барынша қайта өңдеу неғұрлым жоғары қайта бөлу өнімдерін шығару, сондай-ақ экологиялық тазалық пен ең аз энергия шығыны үшін стратегиялық маңызды бағыт болып табылады, - делінген хабарламада.

Министрлік өнеркәсіпті мемлекеттік ынталандыру саласындағы уәкілетті орган ретінде соңғы бірнеше жыл ішінде ішкі және сыртқы нарықтарға бағдарлана отырып, болат өнеркәсібі өндірісін кеңейтуге бағытталған дәйекті жұмыстарды жүргізіп келеді. Бұл - ұлттық өнеркәсіптік саясатты дамытудың негізгі элементі.

Бұйрық 2024 жылдың 22 тамызынан бастап күшіне енеді.