Қазақстандықтарға негізсіз ұсталған МӘМС жарналары қайтарылды
Фото:depositphotos.comАқмола облысының прокуратурасы әлеуметтік медициналық сақтандыру саласындағы жеңілдетілген санаттағы азаматтардың құқығын қорғады, - деп хабарлайды Tengrinews.kz Ақмола облысының прокуратурасына сілтеме жасап.
Ақмола облысының прокуратурасы міндетті әлеуметтік медициналық сақтандыру (МӘМС) саласындағы заңдылықтың жай-күйіне талдау жүргізді.
"Жұмыс берушілер көп балалы аналардан (6-дан астам бала тәрбиелеп отырған), мүгедектігі бар адамдардан және күндізгі оқу нысаны бойынша білім алушылардан төлеуден босатылған МӘМС жарналарын негізсіз ұстағаны анықталды.
Мысалы, көп балалы ананың жұмыс берушісі әлеуметтік медициналық сақтандыру қорына 31 243 теңге аударған", - делінген хабарламада.
Басқа жағдайда, мүгедектігі бар адамнан қордың пайдасына 82 306 теңге мөлшерінде жарна ұсталған. Мұндай деректер аз емес екені айтылды.
Қадағалау актісі бойынша жалпы сомасы 60 миллион теңгеден астам жеңілдік санаттағы 436 адамға ақша қаражатын қайтару жүзеге асырылды.
