Онлайн кездесуде өткен жылы «Алтын белгіні» абыроймен қорғап шыққан жастар үміткерлерге бастан кешкен қиындықтары мен озық дайындық амалдары жайында әңгіме өрбітті. Олар былтыр Ғани Бектайұлымен кездесуде жігерленгенін, нәтижесінде діттеген мақсаттарына жеткенін мәләмдеді. Оқу-ағарту министрі өткен жылы тек бас қаланың түлектерімен кездескенін, биыл жиынның ауқымын арттырып, барлық өңірдің «Алтын белгі» үміткерлерінің ой-пікірін тыңдауды шешкенін айтты.

Бұдан кейін еліміздің әр тарапындағы шәкірттер Ұлттық бірыңғай тесттегі жетістіктері мен таңдағалы отырған мамандықтары, әрі-беріден кейін туған жер, киелі мектебі жайында сөз тарқатты. Сондай-ақ жастардың дамуына мемлекет тарапынан жасалған мүмкіндіктерге тоқталып, келешек елдің дамуына қызмет еткісі келетіндерін жеткізді.

Жиынды Ғани Бектайұлы қорытындылады. Министр жылда аталып өтілетін мектеп бітіру  салтанатын лайықты деңгейде өткізілетінін айтты. Алайда дарақылық пен ысырапшылдыққа жол бермеу керегін ескертті.

Бұдан бөлек өзі туған ауыл, сол тұстағы мектептердің жағдайы жайындағы естеліктерді ойға оралтты. Бүгінгі күні мемлекет білімнен бастап, балалардың өзін дамытуға арналған тетіктерді тегін ұсынып отырғанын, өскелең ұрпаққа тек сол игілікті ұтымды пайдалану ғана қалғанын ашық айтты. Сөз соңында талапкерлердің қадамына оң болсын айтып, алдағы сынақ кезеңдеріне сәттілік тіледі.