ҰБТ тапсыру кезінде калькулятор мен химиялық элементтер кестесін пайдалануға рұқсат етілді

фото
ҚР Ғылым және жоғары білім министрлігінің баспасөз қызметі хабарлағандай, Ұлттық бірыңғай тестілеу электрондық форматқа көшкеннен кейін талапкерлер калькуляторды, химиялық элементтер кестесін және тұздардың ерігіштік кестесін пайдалана алады. Олар тестілеу бағдарламасына енгізілген, – деп хабарлайды Altaynews.kz.

«Химия» пәнінен тест тапсырушыларға компьютерде химиялық элементтердің периодтық кестесі мен тұздардың ерігіштік кестесі болады. Былтырдан бастап кестелердің қағаз нұсқасы да беріледі. Оны тестілеу орнында әкімшілер береді. Үйден өзімен бірге алып келуге болмайды. Осылайша, талапкерлер электрондық кесте форматын да, қағаз форматын да қолдана алады», - деді ҚР Ғылым және жоғары білім министрлігі Ұлттық тестілеу орталығының директоры Руслан Емелбаев.
Сонымен қатар түлектерге «Математикалық сауаттылық», «Математика», «Информатика», «Физика», «Химия» және «География» пәндері бойынша есептерді шығару үшін калькулятор қолжетімді болады.  Тестілеу аяқталғаннан кейін әр пән бойынша тақырыптық талдау болады. Бұл тестілеу нәтижелерін көруге ғана емес, сонымен қатар келесі ҰБТ-ға жақсы дайындалуға мүмкіндік береді.