Мәжіліс отырысында депутаттар «Қазақстан Республикасының Үкіметі мен Түркия Республикасының Үкіметі арасындағы ақпарат алмасуды ұйымдастыру және кедендік бақылау рәсімдерін оңайлату туралы келісімді ратификациялау туралы» заң жобасын ратификациялады.

Құжат Сенаттың қарауына жіберілді.

Заңды таныстарған Қаржы министрі Ерұлан Жамаубаевтың айтуынша, келісім мемлекеттердің аумағы арасында тасымалданатын тауар мен көлік құралдары бойынша деректермен электрондық алмасу арқылы кедендік бақылау жүргізу мерзімін қысқарту мен тиімділігін арттыру мақсатында жасалған.

Келісім ережелеріне сәйкес, тараптардың кедендік органдары алдын ала деректер алмасуды іске асыру мен тікелей байланысты жүзеге асыруға құзыреті бар жауапты тұлғылардың тізімін анықтайды. Сондай-ақ ақпарат алмасудың техникалық шарттарын әзірлеп, пилоттық жобаны іске асыруға кіріседі. Ол аяқталған соң кеден органдары тұрақты түрде деректермен алмасуды бастайды, - деді ведомство басшысы.

Белгілі болғандай, құжат тараптар арасындағы кедендік рәсімдерді жеңілдету мен оңтайландыруға бағытталған.

Ал жауапты комитет бұл келісімді ратификациялаудың мақсаты – мемлекеттердің аумағы арасында тасымалданатын тауар мен көлік құралдары бойынша деректермен электрондық алмасу арқылы кедендік бақылау жүргізудің тиімділігін арттыру мен мерзімін қысқарту екендігін айтты.